Carcassona

Un article de Wikipèdia, l'enciclopèdia liura.

Carcassona es una vila occitana de Lengadòc, situada dins lo departament francés d'Aude e la region administrativa de Lengadòc-Rosselhon.

Somari 1 Istòria 1.1 Abans l'Edat Mejana 1.2 A l'Edat Mejana 1.3 Sos lo reialme francés 2 Demografia 3 Vejatz tanben 4 Ligam extèrn

[Modificar] Istòria

[Modificar] Abans l'Edat Mejana

A Carcassona se crosan dos grands axes de circulacion, que foguèron utilizats dempuèi l'Antiquitat : de la Mar Mediterranèa a Ocean Atlantic, e del Massís Central a Espanha.

La vila se compausa de doas parts plan diferentas. Ciutat se quilha sus un planòl sus la riba dreita d'Aude. La Bastida de Sant Loís s'espandís sus la riba esquèrra. Las traças umanas mai ancianas se trapan sul puèg de Ciutat, e datan del sègle VI abans JC.
En 300 abans JC, los Cèltas s'impausan coma los mèstres de la region, mas al sègle II abans JC, los romans conquistan Provença e Lengadòc. Arriban a Carcassona e fortifican l'oppidum que pren lo nom de Carcasso. Los Romans ocupan la region fins al sègle V.

Los Visigòts son alara los novèls envasidors e s'installan en Espanha e en Lengadòc. Carcassona demorarà entre lors mans de 460 a 725. A la prima de 725, son los Sarrasins que venon e que s'apoderan de Ciutat. Carcassona se ditz alara Karkashuna. Mas los Sarrasins son fòrabandits de Lengadòc pro rapidament, los Francs prenon la seguida en 759.

[Modificar] A l'Edat Mejana

Aprèp lo periòde de la Renaissença Carolingiana, quand los mèstres novèls del país prenon per lor compte l'eiretatge roman, l'Empèri esclata, çò que dona naissença a l'epòca feudala. Es amb la dinastia dels Trencavèls (de 1082 a 1209) que la vila s'afirma coma centre politic e cultural excepcional. Aquel periòde ric vei lo desvolopament del catarisme. Los vescomtes tolèran, emai protegisson l'eretgia sus lors tèrras. Aquesta actitud de tolerància aurà per consequéncia la fin de la dinastia e la pèrda de l'independéncia occitana.

La Crosada contra los Catars lançada pel Papa vira lèu-lèu a una guèrra de conquista, e en agost de 1209, aprèp un sètge de 15 jorns, lo jove vescomte de Carcassona es pres pels Franceses. Tot es acabat, las tèrras dels Trencavèls son atribuidas a Simon de Montfort, puèi passan al rei de França en 1226.

Amb son annexion al reialme de França, lo destin de Carcassona va prene una autra direccion.

Jols règnes franceses successius de Loís IX, Felip III e Felip IV lo Bèl, la vila pren sa fisionomia actuala. Aprèp la temptativa de reconquista dels Occitans que fa mèuca en 1240, los barris de Ciutat son derroits. Un borg novèl nais en 1262 sus la riba esquèrra d'Aude : la Bastida de Sant Loís. Es incendiada en 1355 pel Prince Negre, e reconstruida sul còp, amb de fortificacions pus solidas.

[Modificar] Sos lo reialme francés

La Bastida se desvolopa plan rapidament e ven un centre comercial de primièra importància, particularament gràcias a l'industria textila. Carcassona expòrta sos draps fins al Levant.

Ciutat s'afirma mentretant coma fortalesa reiala. Mas l'utilizacion de tecnicas novèlas de guèrra, e subretot lo desplaçament de la frontièra franco-espanhòla en 1659 amb lo tractat dels Pirenèus provòcan pauc a pauc son abandon.
Al sègle XVIII, Ciutat es pas mai qu'un quartièr miserable de la vila ont se son creadas de fortunas immensas. Ne testimònian encara los ostals particulars que se trapan dins la Bastida.
L'obertura del Canal del Miègjorn (1682) accentua encara lo fenomèn. Ciutat que s'arroïna es salvada de la destruccion totala per Joan Pèire Cros Mairevielha, un erudit carcassonés, Prosper Mérimée, e lo famós arquitècte Eugène Viollet-le-Duc, que restauran la fortalesa al sègle XIX.

[Modificar] Demografia

Evolucion demografica

1793 1800 1806 1821 1831 1836 1841 1846 1851 10 400 15 219 14 985 15 752 20 997 22 623 21 333 21 607 29 298

1856 1861 1866 1872 1876 1881 1886 1891 1896 19 915 20 644 22 173 24 407 25 971 27 512 29 330 28 235 37 035

1901 1906 1911 1921 1926 1931 1936 1946 1954 30 720 30 976 30 689 29 314 33 974 34 921 33 441 38 139 37 035

1962 1968 1975 1982 1990 1999 2005 - - 40 897 43 616 42 154 41 153 43 470 43 950 45 800 (estimacion) - - Nombre retengut a partir de 1962 : populacion sens comptes dobles

[Modificar] Vejatz tanben

• Ciutat de Carcassona

[Modificar] Ligam extèrn

• (oc) http://mescladis.free.fr/oc_istoria.htm Istòria de Carcassona