Vlag van Nederlands Limburg
Van Wikipedia
Dit artikel is gesjreve in 't Valkebergs. 't Weurt gewaardeerd óm in dit artikel 't Valkebergs aan te hauwe of aan te gaeve welk anger dialek gebroek is.
De vlag van Nederlands Limburg haet twiè gelieke horizontaal bane van wiet (bove) en geel (ónder). Die bane were gesjeije door 'n sjmaler blauw baan. Euver dees drie bane sjteit aan de hijskant 'n gekroande roaje lièw mèt 'ne dubbele sjtaart. De vlag ies door Provinciaal Sjtate vasgesjtèld op 28 juni 1953.
De vlaggekleure kómme oet 't provinciewape, dat op 27 december 1886 bie Keuninklik besjloet door keuning Willem III van de Nederleng aan Limburg woort toegekènd. De lièw symboliseert Limburg en verwies ouch nao 't oud hertogdóm Limburg, woavan 't gróndgebeed trouwes bienao neet euvereinkump mèt de provincies Limburg wie me ze allewiel kènt. De kroan en de dubbele sjtaart make häöm de Limburgse lièw. De blauw baan sjteit veur de Maas, die van zuid nao noord door de provincie sjtruimp.
