De re rustica (Varro)

E Vicipaedia

De re rustica^[1] dialogus est in tribus libris a Marco Terentio Varrone Reatino annum octogesimum agente scriptis (anno fere 36 a.C.n.), muliere sua Fundania dicatis.

[recensere] Scriptores anteriores de re rustica

In praefatione huius libri Varro brevem historiam producit litteraturae Graecae de agri cultura:

Qui Graece scripserunt dispersim alius de alia re, sunt plus quinquaginta. hi sunt, quos tu habere in consilio poteris, cum quid consulere voles, Hieron Siculus et Attalus Philometor: de philosophis Democritus physicus, Xenophon Socraticus, Aristoteles et Theophrastus peripatetici, Archytas Pythagoreus: item Amphilochus Atheniensis, Anaxipolis Thasius, Apollodorus Lemnius, Aristophanes Mallotes, Antigonus Cymeus, Agathocles Chius, Apollonius Pergamenus, Aristandros Atheniensis, Bacchius Milesius, Bion Soleus, Chaeresteus et Chaereas Athenienses, Diodorus Prieneus, Dion Colophonius, Diophanes Nicaeensis, Epigenes Rhodios, Euagon Thasius, Euphronii duo, unus Atheniensis, alter Amphipolites, Hegesias Maronites, Menandri duo, unus Prieneus, alter Heracleotes, Nicesius Maronites, Pythion Rhodius. De reliquis, quorum quae fuerit patria non accepi, sunt Androtion, Aeschrion, Aristomenes, Athenagoras, Crates, Dadis, Dionysios, Euphiton, Euphorion, Eubulus, Lysimachus, Mnaseas, Menestratus, Plentiphanes, Persis, Theophilus. hi quos dixi omnes soluta oratione scripserunt; easdem res etiam quidam versibus, ut Hesiodus Ascraeus, Menecrates Ephesius.

– Varro, De re rustica 1.1.8-9

Addit de scriptore Punico Magonen et de Cassio Dionysio interprete operis Magonis in lingua Graeca. De Catonis libro De agri cultura hoc loco nihil dicit; alibi autem Catonem multotiens citat, aliosque qui Latine scripserant ut Ennium, Plautum, Lucilium, Pacuvium, Terentium, Sasernas, et L. Abuccium coaevalem Varronis ipsius. Citat et historicos, Timaeum, Catonem in Origines, necnon philosophos, Archelaum, Dicaearchum, Zenonem Citiensem, Euhemerum (ab Ennio Latine versum), Pythagoram, Thaletem.