Juan S.P. Hidalgo, Jr.

Manipud iti Wikipedia

Juan S.P. Hidalgo, Jr.
Ni Juan S.P. Hidalgo, Jr. (ladawan manipud iti libro a "Bituen ti Rosales ken Dadduma pay a Sarita")
Naipasngay
Julio 12, 1936 Manila, Filipinas

Ni Juan S.P. Hidalgo, Jr. (naipasngay idi Julio 12, 1936), maysa nga Ilokano a fiksionista, novelista, mannaniw, editor, agipatpatarus, ken pintor. Isu ti sigud a manarawidwid nga editor ti magasin a Bannawag, a nagpaayanna iti 37 a tawen (1961-1998) kas kangrunaan nga editor iti literatura. Nagpaay pay kas editor ti magasin a Rimat.

Iti kaaddana iti Bannawag iti dandani uppat a dekada, inggubetna ti nangibagnos ken nangtignay ken nangsursuro kadagiti Ilokano a mannurat iti Iloko tapno makaputarda iti de-kalidad nga obra iti Iloko a pumadpad wenno rumimbaw pay kadagiti obramaestra a sinurat iti lubong. Ni Hidalgo ti nanggubuay iti pannakabangon ti Gunglo dagiti Mannurat nga Ilokano wenno GUMIL kas maysa a nailian ken internasional nga organisasion.

Bigbigen dagiti kakaduana a mannurat a kas "henio iti literatura nga Iloko", impablaak ni Hidalgo idi 1969 ti klasiko itan a libro a "Bituen ti Rosales ken Dadduma Pay a Sarita", a nakatiponan ti 20 nga ababa a sarita. Daytoy a libro ti agbalin, kas pasingkedan dagiti kritiko ken eskolar iti literatura, a kas maysa nga "ofisial a textbook para kadagiti kontemporario a mannurat iti Iloko" gapu iti inspirasion ken paratignay ken nasaknap nga inpluensiana iti amin a serioso a mannurat iti Iloko.

Maipangruna met mabigbig kas tour de force a naliteraturaan nga obra iti Iloko ti kaudian a novelana a "Saksi ti Kaunggan", a nangestoria kadagiti pagteng ken pasamak iti Revolusion iti EDSA idi 1986, gapu iti naisangsangayan nga estilo ken experimento iti panangisurat a naaramat itoy.

Kas maysa nga editor ken agipatpatarus, nagipablaak kadagiti antolohia ti napili nga ababa a sarita iti Iloko, ken nagipatarus kadagiti novela ken ababa a sarita nga Aleman ken Japones.

Nangrugi nga agpinta idi 1979 ket maysa kadagiti kameng a nangbangon iti U.P. Campus Sunday Group, maysa a gunglo dagiti pintor iti Universidad ti Filipinas. Nairaman dagiti pinintaanna kadagiti nadumaduma a pabuya iti pinintaan iti Metro Manila ken kadagiti provincia.

Naipasngay iti Intramuros, Manila, dimmakkel iti Rosales, Pangasinan. Nagannakna da Juan Peralta Hidalgo ti Dingras, Ilocos Norte ken Felisa Alberto Sanchez ti Tomana, Rosales, Pangasinan.

Inkallaysana ni Namnama Garma Prado ti Piddig, Ilocos Norte, addaanda iti tallo nga annak a babbai: da Maria Bituen (nayanak idi 1970), Patricia Amor (nayanak idi 1971), ken Marie Sol (nayanak idi 1973).

[baliwan] Obra

• Novela: "Tomana" (1971), "Tarumamis" (1973), "Ti Obra Maestra" (1974) "Derraas ken Pannakatnag" (1976), "Apuy iti Ubbog ti Diro" (1977), "Dagiti Kulalanti" (1979), "Saksi ti Kaunggan" (1986)

• Novelita: "Ti Langitmo a Kaibatogak" (1968), Bileg (1968), "Dagiti Annak ti Init Nagsublidan iti Daga" (1978)

• Ababa a sarita: "Bituen ti Rosales," "Tallo a Lallaki ken Maysa a Kari," "Dagiti Panniki ti Montalban," "Taraon dagiti Didiosen," "Proserpina," "Sharon," "Adan," "Orkidia," "Anglem," "Kampilan," "Batekan," "Propeta," "Ti Ubing iti Bulan," "Bituen ni Namnama," "Katedral Ti Rosales"

• Biografia: "Birhen Maria" (1980), "Ti Mensahe ti La Salette" (1982)

• Antolohia/Patarus: "Napili a Sarita dagiti Ilokano" (1968), "24 a Napili a Sarita dagiti Ilokano" (1969), "Bituen ti Rosales ken Dadduma Pay a Sarita" (1969), "Napili a Sarita dagiti Aleman" (1970), "Ni Emil ken dagiti Detektib" (1973), "Dagiti Napili a Sinurat manipud iti Literatura Aleman" (1974), "Puso a Balitok" (1978), "Sarsarita idi Ugma manipud Asia para kadagiti Ubbing iti Amin a Lugar" (1988), "Napili a Sarita dagiti Hapones" (1989)

[baliwan] Pammadayaw

• Cultural Center of the Philippines (CCP) Gawad CCP Pambansang Alagad ng Sining sa Panitikan (1991)
• U.P. Vanguard Life Achievement Award for Literature (1991)
• Cornelio Valdez Award (1992)
• Senator Heherson T. Alvarez Award for Literature (1994)
• Pedro Bucaneg Award