Joseph L. Mankiewicz

Na Galipedia, a wikipedia en galego.

Joseph Leo Mankiewicz (Wilkes-Barre, Pensilvania, 11 de febreiro de 1909 - Bedford, Nova York, 5 de febreiro de 1993), foi un director de cine estadounidense.

[editar] Biografía

O seu pai, Franz, exiliouse de Alemania, chegando ós Estados Unidos como profesor no New York City College.

O mozo Joseph comezou a carreira de medicina, na especialidade de psiquiatría, pero unha baixa puntuación nunha asignatura impediulle terminar eses estudios. Porén, en 1928 conseguiu un diploma en Arte da Universidade de Columbia. Unha vez terminados os estudios, Joseph viaxou a Berlín, onde traballou como corresponsal do Chicago Tribune e onde empezou a afeccionarse polo teatro e o cine (naqueles momentos estaba en pleno apoxeo a corrente expresionista do cine alemán). A súa única aportación ó cinema alemán foi o de tradutor de intertítulos para a productora UFA. En 1929 o seu irmán Herman chamouno desde Hollywood, onde traballaba como guionista, e dado que Joseph non se encontraba no seu mellor momento económico, decidiu aceptar a invitación.

Os primeiros pasos no cine estadounidense deunos nos estudios Paramount onde tiña unha labor secundaria e sen apenas relevancia profesional. Pouco despois e xa baixo contrato coa Metro-Goldwyn-Mayer, obtivo o seu primeiro éxito profesional ó colaborar no guión do melodrama negro "Manhattan Melodrama" (1934) dirixida por W. S. Van Dyke, película que conseguiu o Oscar ó mellor guión orixinal, aínda que o premio foi concedido a Arthur Caesar, xa que foi o que asinou finalmente o guión. Pero aquel primeiro paso deu resultados positivos, que se consolidaron con outros dous guións para o mismo director pensados como vehículos para o lucimento da actriz Joan Crawford, "Forsaking All Others" (1934) y "I Live My Life" (1935).

Alentado polo seu xa exitoso despuntar, intentou que Louis B. Mayer lle deixase dirixir os seus propios guións, pero Mayer sopesaba moi ben a valía de cada un dos seus empregados antes de embarcalos nun proxecto diferente ó que habitualmente desempeñaban. Malia que non cedeu ós seus intentos, si que accedeu nembargantes a nombralo productor, desempeñando moi notablemente este cargo entre 1935 e 1942, periodo no que produciu 19 películas para MGM, entre as que destacan "Fury" (un alegato contra a intolerancia e o racismo, nunha lectura claramente política dirixida en 1936 por Fritz Lang) e "The Philadelphia Story", unha comedia sobre a loita de sexos dirixida por George Cukor en 1940.

Decepcionado por non poder dirixir as súas propias películas, Mankiewicz deixou a MGM e se puxo ó servizo da 20th Century Fox. Neste estudio realizou a súa ópera prima como director, "Dragonwyck" (1946), dirixindo á fascinante Gene Tierney con secundarios do calibre de Jessica Tandy ou Vincent Price. En 1949 estrenou "A Letter to Three Wives", película coa que obtivo dous premios Oscar, o de mellor guión adaptado e o de mellor dirección, e que conta coas interpretacións de Kirk Douglas e Linda Darnell, nunha historia tan innovadora como "Sunset Blvd." en canto a narrativa fílmica.

O éxito desta película foi refrendado ó ano seguinte coa súa seguinte película, un dos considerados clásicos da sétima arte, "All About Eve" (1950). Con esta película obtivo seis Oscar, entre eles o de mellor película, mellor dirección e mellor guión adaptado.

Ata chegar ó que Mankiewicz chamou o seu pesadelo, "Cleopatra", sucedéronse outras películas destacadas, como "5 fingers" (1951), con James Mason e Dannielle Darrieux; "Julius Caesar" (1953), con algúns dos mellores actores da época no reparto (Marlon Brando, James Mason, Deborah Kerr, Greer Carson ou Louis Calhern); "The Barefoot Contessa" (1954), coa mellor actuación de Ava Gardner ata ese momento; "Guys and Dolls" (1955), o único musical que dirixiu; o "Suddenly, Last Summer" (1959), adaptación á gran pantalla dunha historia de Tennessee Williams.

Tras un desastroso prólogo en Londres, onde houbo que desbotar todo o material filmado, en setembro de 1961 reiniciouse en Roma a rodaxe da epopeia histórica baseada na vida da raíña exipcia Cleopatra, que se prolongou ata 1963. Esta película supuxo a primeira vez que unha actriz (Elizabeth Taylor) cobraba 1 millón de dólares por un traballo cinematográfico, pero os desastres de toda índole que rodearon a preparación e a rodaxe desta película quebrantaron a saúde de Mankiewicz, que necesitou dous anos para se recuperar. Malia a espectacularidade da película, a cinta decepcionou á crítica e público no seu estreno, convertíndose nun dos maiores desastres de taquilla da historia.

En 1967 dirixiu "The Honey Pot", película que foi recibida friamente pola crítica e o público; en 1970 realizou o seu único western, "There Was a Crooked Man..."; e en 1972 puxo fin á súa carreira cinematográfica filmando a adaptación da obra teatral de Anthony Shaffer, "Sleuth".

Faleceu o 5 de febreiro de 1993 en Bedford (Nova York), a piques de cumprir 84 años, a causa dun ataque ó corazón.