Miluçâr
De Vichipedie, la enciclopedie libare dute in marilenghe.
- Non furlan :Melâr o ben Melarie o Miluçâr o Lopâr
- Non sientific:Pirus Malus L.
Il Melâr, o ben Melarie, o Miluçâr, o ben Lopâr, origjinari des regjons temperadis de Asie e de Europe, si è podaspò slargjât in plusôrs zonis de Americhe disore. Chenti di nô in Furlanie al ven su e si lu coltive sedi tal plan che tai sîts di mont, dulà che ca e là si è ancje salvadeât.
De famee des Rosacee, cheste plante e po rivâ insin a une altece di dîs metris. Di ramadure taronde e à la scusse dal tronc grise scure, che si creve in scais sutilis, scuasit cuadradis.
Lis fueis semplicis a son ovâls e a onte, cui ôrs dentelâts che a vegnin su in piçui çufs su lis ramutis pui curtis. Dutun cu lis fueis a dan fûr lis rosis blancjis a cinc pics, unîts in grops suntun mani comun.
Il frutam a son cognossûts mêi o miluçs, di forme taronde dulà che il fons de rose, deventât cjarnôs, al cjape atôr atôr une part interne dade adun dal ovari svilupât cu lis piçulis sepis neris. Il cjalis al reste sore vie de pome e al esist simpri un vueit alì che al ven fûr il mani: cheste ultime particolaritât e diference la pome dal Melâr di chê dal Perâr.
