Gallia Cisalpina
Oddi ar Wicipedia
Gallia Cisalpina, yn golygu "Gâl yr ochr yma i'r Alpau" oedd enw'r Rhufeiniaid ar ran o ogledd yr Eidal oedd yn cynnwys taleithiau presennol Emilia-Romagna, Friuli-Venezia Giulia, Liguria, Lombardi, Piedmont, Trentino-Alto Adige/Südtirol a Veneto). Daeth yn dalaith Rufeinig yn amser y Weriniaeth. Ystyrid yr ardal yn ran o Gâl am fod y boblogaeth i rannau helaeth yn Geltiaid.
Enwau eraill ar y dalaith oedd Gallia Citerior (Gâl agosaf), Provincia Ariminum, a Gallia Togata (Gâl sy'n gwisgo Toga). Gelwid y rhan rhwng Afon Po a'r Alpau yn Gallia Transpadana. Mutina (Modena heddiw) oedd prifddinas y dalaith. Ffin ddeheuol y dalaith oedd Afon Rubicon, ac i'r de o'r afon roedd talaith Italia ei hun. Pan groesodd Iŵl Cesar yr afon i Italia gyda'i fyddin yn 49CC dechreuodd ryfel cartref a arweiniodd at ddiwedd y Weriniaeth Rufeinig a sefydlu'r Ymerodraeth Rufeinig.
Tua 43 neu 42 CC, unodd Octavian (yr ymerawdwr Augustus yn ddiweddarach) y dalaith ag Italia. Yr enwocaf o feibion Gallia Cisalpina yw'r bardd Fyrsil.
