Herve ar Gall
Diwar Wikipedia, an holloueziadur digor
[kemmañ] Buhez
Herve Ar Gall a zo ganet e Loudieg d’an 10 a viz Du 1952. Pa oa c’hwec’h miz ez eo aet da chom da b/Porzhig e-kichen Sant-Brieg. E vamm a gomze gallaoueg hag e dad a ouie brezhoneg. Desket en deus un tamm brezhoneg gant tud a oa tro-dro dezhañ. Da drizek vloaz ez eo kroget gant kentelioù Skol Ober. E 1978 ez eo kroget da vat gant ar brezhoneg o vont d’ar c’hentelioù noz a oa e Sant-Brieg pa oa 26 vloaz. Da c’houde, ez eas Herve da b Plounevez-Kintin a-benn peurzeskiñ brezhoneg. E Porzhig en doa tapet e santifikad hag e oa bet deskard tredaner ha tredaner da heul goude se. Er bloavezh 1975 en deus bet ur “BEP” elektroniour. E 1982 en deus lakaet e anv e Skol-Veur Roazhon, a-benn prientiñ dre lizher an aotreegezh war un dro gant ar vachelouriezh en doa prientet e-unan. Goude-se, ez eo deuet da vezañ skolaer e Diwan, hag e miz Gwengolo 1989 e roe lañs da skol Diwan Kemperle. Labouret en deus enni betek ar bloavezh skol 2004/2005. E-pad tri bloaz en deus labouret Herve Ar Gall e skol Diwan Kemperle e-giz rener skol. Bremañ emañ e Karaez oc’h ober skol. Herve Ar Gall a zo ezel eus kevrenn UDB (Unvaniezh Demokratel Breizh) Kreiz-Breizh.
[kemmañ] Oberennoù
Graet en deus un dek barzhoneg bennak embannet gant Al Liamm ha kelaouennoù all Un danevell gounezet trede priz kenstrivadeg Emglev An Oriant gantañ. Ur romant anvet "Piv a glevo" embannet gant Embannadurioù An Alarc’h, gounezet gantañ Priz Langleiz e 2003. Skrivet en deus ivez un eil romant hag a vo embannet gant Al Liamm ar bloaz a zeu. Skrivañ a ra ur bajennad bep miz e kelaouenn ar strollad UDB, "Le peuple Breton" (Pobl Vreizh) e anv.
[kemmañ] Un tamm diverradenn eus e romant “Piv a glevo ?”
"Piv a glevo?" a gont istor ur c’hrennard war vord ar mor e korn-bro Sant-Brieg da vare brezel Aljeria. Tammoù envorennoù yaouankiz zo ennañ. An den yaouank a zo en istor a sell ouzh an darvoudoù a c’hoarvez er vro. Troet eo da brederiañ, d’en em soñjal a-ziwar an darvoudoù-se. Met ren a ra e vuhez krennard ivez, e-mesk paotred fall ar vro...
