Orden de San Chaime
De Biquipedia
La Orden de San Chaime (conoxita a begatas como Orden de Santiago por estar orichinaria de Castiella) ye una orden melitar meyebal naxita en la Peninsula Iberica en lo contesto de la Reconquista. Amanixió en l'año 1170 dimpués de la reconquista de Cazeres, cuan Ferrando II de Lión fundó la cofrairía de los flaires de Cazeres, confirmata en 1175 por lo Pontifiz.
La suya primera presenzia en Aragón ye en 1212, cuan lo mayestre Fernando González aduyó á Pero II d'Aragón á prener Mont Albán. Lo rei donó la billa á lo mayestre, que fundó una comanda de la Orden, que esdebenirba la casa matriz de los suyos establimientos en la Corona d'Aragón. Lo combento de la billa de Mont Albán yera chusmeso á lo prinzipio á lo prior d'Uclés, qui yera los rezetor de las rendas de los diferens zentros santiaguistas.
La Orden teneba dos categorías de miembros, clerigos e laicos, estando la unica milizia relichiosa de la Edat Meya que almeteba chent casata en las suyas filas. Aduyoron á la reconquista de lo reino de Balenzia. Lo comandador de Mont Albán conduzió á lo campo de Batalla á los caballers de Santiago e tamién á los abitadors de la billa.
A mitat de lo sieglo XIII los dominios de la orden se fazioron grans, por donazions u compra, estabilizando-se lo suyo patrimonio á finals d'este sieglo.
Las més importants posesions santiaguistas en lo reino d'Aragón estioron:
- La Comanda de Mont Albán.
- Lo Espital de San Bartolomé de Zaragoza (clamato dimpués de la Merzet)
- La Casa de la Merzet de Tergüel.
- La Comanda de San Marcos de Tergüel .
- Lo lugar de Billanueba de la Uerba.
- Tamién tenioron propiedaz e biens en Calatayú e Albarrazín.
La Orden de San Chaime tenió importanzia tamién en lo reino de Murzia en o periodo d'ocupazión aragonesa (1296-1304). En l'Archibo de la Corona d'Aragón bi ha testos que en charran:
- Al noble e amado don Johan Osores, maestro de la Horden de la cavalleria de Sant Jayme et cetera.
- Entendiemos que agora avíades çitado a Ferrant Péreç, comendador de la val de Ricot, a capítol e que allí le avíades tuelta la comanda de Ricot e que la queríades dar a otro. E como el dito Ferrant Pérez sia homne bueno e en qui muyto podría homne fiar, e él la su comanda aya tenido bien e lealment assí que danno ni menoscabo no a venido por él al regno nuestro de Murcia, rogamos vos que por amor de nos embiedes al dito Ferrant Pérez por comendador de Ricot assí como la tenía, et si por ventura por cosas que.l fiçiesse contra la Orden lo avíades a mudar de la dita comanda, que consintades que la tenga el dito Ferrant Pérez entro que nos ayades certifficado a qui tenredes por bien de comendarla, que se faga con nuestra voluntat porque nos no end ayamos a aver sospeyta, e gradecer vos lo hemos muyto.
- Dada en el sitio del castiello de Lorca, III días por andar del mes de junio et cetera.
- Petrus Martini, mandato Guillermi Durffortis.
- ARCHIVO DE LA CORONA DE ARAGON, C, reg. 253, fol. 27v.
