Vile-so-Inne
Èn årtike di Wikipedia.
Vile-so-Inne (fr: Ville-sur-Haine, so plaece Vile-sur-Ène) est èn ancyin ptit ban del Walonreye, rebané avou El Rû, el province do Hinnot.
- Artondixhmint: Sougniye
- Limero del posse: 7070 (vî limero 7041)
- Limero diyalectolodjike: S 33
- Lingaedje do payis: picård
L' etimolodjeye do no vént do latén “Villam super Hainam”.
[candjî] Istwere
Foirt vî viyaedje k' esteut ddja ocupé do timps di l' ådje do fier. Do tins des Francs il aveut stî dné a l' abeye di Sinte-Wådrou d' Mont et pu passer dins les mwins des familes de Ville, Roeulx, d'Avesne et de Croÿ.
Tot å lon di l' istwere, Vile-so-Inne a conou bråmint d' batayes, di piyaedjes et d' sacaedjes do fwait ki c' esteut on passaedje sitratedjike po les årmêyes (i sufit d' vey tos les refoircîs tchesteas, bastimints et grossès cinses d' avårla po s' è rinde conte).
[candjî] Economeye
L' agriculteure et l' aclevaedje ont lontins stî les deus seus ritches sourdants do viyaedje et sont eco pratikés ådjourdu. Ci n' est ki bråmint pus tård k' on-z î a drovou des fors a tchåsse, deus bressenes, ene soucrereye, ene cimintreye, ene verreye et ene fabrike di prodûts tchimikes. Tot ça a malureuzmint clôs asteure et Vile-so-Inne a rdivnou on pitit viyaedje trankile.
