Motî:taxhlete
Èn årtike di Wikipedia.
taxhlete
I. [f.n.]
1. taxhete (agritcheye al cingue). F. pochette.
2. flantchet d' pourcea. F. flanc de porc.
3. brijhe (djeu). On va djouwer al taxhlete. F. bâtonnet.
II. al taxhlete [advierbire]
1. (tot djåzant d' on livraedje å djeu d' bale, d' on hinaedje di pire) tot s' metant d' bihair, tot passant l' bresse tot do long del pwetrene, pus l' rescouler céncwante cm padrî, pus l' enonder et s' arester tot låtchant l' bale u l' pire djusse al plaece k' on pindeut ene taxhete sol cingue, dilé l' hantche. Li livraedje al taxhlete denne dipus d' alondon al bale. Il a rouwé on cayô al taxhlete (F. Deprêtre et N. Nopère). Contråve : a toû d' bresse. Loukîz a : taxhleu. >> taper ses liårds al taxhlete: les furler. Loukîz a : taxhler. F. jeter l'argent par les fenêtres.
2. di triviè, må, sins rwaitî a lu. I travaynut al taxhlete. Paski l' novele muzike d' eglijhe, ci n' est pus k' sacwants ptitès årgudinnes, todi les minmes tocosté; ele cournut al taxhlete å raeze des tcheyires, po n' nén dire a raeze di tere; c' est må toirtchî, c' est må tchanté (E. Gilliard). Les lingaedjes sont tot såf racionels: i sont bastis tertos al taxhlete pa cint meye halcotîs, avou tchaeke si idêye (L. Hendschel). On dit eto: brouxhirmint. F. grossièrement, sans soins, de travers. >> dire ene sacwè al taxhlete: dire ene sacwè sins bråmint tuzer, moins ki fwait rire. F. lancer un bon mot.
3. al varade, tot sayant k' on n' vos voeye nén. Et pol pårt da Nanete, On côp d' ouy al taxhlete (L. Pirsoul). Li live da Joseph Osselet, c' est on côp d' ouy al taxhlete so les djins, les monumints, les uzaedjes do vî Nameur. Ene alnute, dj' a fwait vni on curé, al taxhlete, po lyi apoirter l' bon Diè (L. Hendschel). Zande s' aveut aclapé a leye padrî et, al taxhlete, lyi mete si mwin so si spale (L. Mahin). F. discrètement, secrètement, à la dérobée, en douce, en catimini. >> citer al taxhlete: citer ene des rlès sacwès. Gn a waire di spirous rashious e lingaedje walon; on cite djusse, al taxhlete li binde d' imådje walone BD dal Sabine Coune, so on scrijhaedje då Gusse Laloux (L. Mahin). F. pour mémoire.
- Dipus d' racsegnes sol livraedje al taxhlete e djeu d' bale
- Dipus d' racsegnes sol djeu d' taxhlete (brijhe)
- "Al Taxhlete", c' est ene ramexhnêye d' arimeas da G. Smal
