Likeur di purnale
Èn årtike di Wikipedia.
Li likeur di purnales (on dit eto gote di purnale, likeur di fordenes, c' est ene soucrêye gote fwaite avou del blanke gote et des purnales ki bagnnut dvins.
I fåt k' il åye djalé di onk a troes côps, po k' les fordenes soeyexhe ene miete bleteyes. Po vey s' ele sont bounes, on les pout groujhî on pô inte ses dints. S' ele ni rdjutèt nén assez, fåt co ratinde 8 djoûs.
[candjî] Ricete del gote di purnales
Po fé 8 lites di gote, vos codoz ene pinte di purnales (plin on cantea d' deus lites). Vos scawez les cenes k' ont vnou avou l' cawe; vos lzès spåmez et vos les stitchîz dins les vudès botayes, disk' å cwårt del hôteur.
Adonpwis, vos metoz, avou on traitoe, ene djatlêye di fén souke et on cwårt di lite (et ene rawete) d' alcol a 90 digrés.
Pu, vos rbatijhîz avou del bolowe aiwe (del bolante aiwe, rafroedeye).
On l' pout rbatijhî seulmint après, djusse divant del boere.
El fåt leyî rpoizer, al boune, èn an. Adon, ele divént tote rodje.
Di tenawete, alez s' riwachoter les botayes, po dismantchî l' souke ki rashît å fond.
Ça s' wåde ad vitam eternam.
[candjî] Prôpietés del gote di purnales
- Elle aide didjerer : on l' pout boere après ene cråsse eurêye.
- Vos boevoz ça eto al shijhe, po bén doirmi.
