Jean Wisimus
Èn årtike di Wikipedia.
Jean Wisimus a skepyî e 1868 et mori e 1953.
Si mwaisse ouve fourit li Motî d' Vervî.
C' esteut eto on scrijheu e walon. Ses ouves, foû do teyåte, ont stî ramexhnêye en on live "Des rôzes et des spenes" ("Dès rôses èt dès spènes") (1926).
Di s' mestî, li Djhan Wisimus esteut martchand d' linne a Vervî, et apoirteu-espoirteu eternåcionål.
[candjî] Vicåreye
Tot djonne, il askepieye, avou des soçons ene gazete (eplaideye so do vert papî) "li Trô d' Soteas", pu scrire dins ene foye ki n' rexheut nén a tinzayeure "li pont d' Poleur".
Il a eto scrît e francès dins "le Jour" dizo l' no d' pene P. Simiste.
Pol teyåte, il a scrît "Måle Voye" on drame e deus akes (1902). Pu ratourner e walon ene pîce d' Erckmann-Chatrian, "l' ami Fritz" so l' tite "l' ami Zidôre", et avou Maurice Noël "Djonnes Maryîs". Do 30 di setimbe 1912 disk' å prumî d' awousse 1914, il amonte, avou ses cwårs, ene rivowe "Verviers-Chronique (théâtre, arts, littérature, idées)".
E 1914, il a stî ramassé pås Prûsyins, et passer troes moes al prijhon d' Nameur. Mins i lzî tént tiesse, fén conte fén, ey esse finålmint rlåtchî.
Après l' guere di 1914-1918, i riscrît des bokets e walon dins le Jour, dins ene coirnêye "li ridant ås rahisses".
Après l' guere, i boute po-z aidî les ancyins combatants. Si va-t i scrire e francès deus corwaitas economikes ki seront cnoxhous lon et lådje.
- Sind wir barbaren ? (estans dj' des Barbåres ?). Il î mostere ki les Almands ont distrût les oujhenes walones, nén po-z aveur do fier, mins po s' fé cwite del concurince.
- "L' anglais, langue auxiliaire internationale'". I dit profeticmint ki c' est l' inglès ki dvreut divni, pitchote a midjote, li lingaedje di l' economeye eternåcionåle.
