Chantal Denis
Èn årtike di Wikipedia.
Chantal DENIS, a skepyî e 1953. C' est ene sicrijheuse e walon et ene ricwereuse sol walon do payis d' Nameur.
Ele kiminça a raprinde li walon sol tård (1995), amon les Relîs Namurwès, copurade avou Lucien Somme, k' elle a coplé dins si "Live di mots d' après Nameur et avår la", et dins li Coleccion Somme Denis di romans e walon.
Chantal Denis a raddimint-st avnou al copete del schåle, aprume come sicrijheuse di romans.
Elle a rascodou tos les grands pris di scrijhaedjes e walon avou ces lives la :
- li pris do Coirneu di Hu avou "Ene måjhone sins finiesse".
- li pris del Kiminålté Walonreye-Brussele avou "Dji vôreu k' i ploureut".
- li pris del Veye di Lidje (2005) avou "Et mi, dji vs ratindeu".
Mins c' est purade come diccionairresse k' i gn a nouk a lyi prinde, tot voeyant si Dictionnaire français-wallon d' après Nameur et avår la (2001). Ci ovraedje la est l' prumî ki dene des fråzes d' egzimpe, et manaedjî eto les mots ki rivnèt tofer dins l' francès d' asteure, metans problinme.
Come sicoleuse do walon, elle a-st eplaidî “Li walon pate a pate” (1998), pu enonder li prumire rivowe po ls efants e walon, “Cou dzeu cou dzo” (1997-2000). Et ratourner e walon des tchansons d' efants (1998). Ele a dné scole ås efants d' Lignè (1999-2002). Elle a eto eplaidî des sillabusses po ses scoles di walon des Relîs.
A stî rçûte ås Relîs Namurwès e 1995, et come SLLW-resse e 2002.
Ele sicrît dins on walon rfondou namurwès, dins li stîle “Relîs 1990” (coûtès fråzes, croejhete et motî sognîs), sins aconter l' accint di si viyaedje. Elle a spårdou, pa onk di ses tecses, li rwalonijhaedje del cawete inglesse “-ing” e “-igne”.
A dater d' 2005, ele va scrire dins des ôtes accints come li walon d' Djiblou. Adonpwis, a cmincî d' 2006, ele va diswalper, avou Joseph Daffe et Geneviève Coulon, èn ehåyî walon do Mitan.
Ådvins |
[candjî] Djivêye di ses romans
- “Ene måjhone sins finiesse” (2001)
- “On byin bråve ome” (2002)
- “L' ouxh å lådje” (2003)
- “Dji vôreu k' i ploureut” (sicrît e 2004, nén eplaidî)
- “Et mi, dji vs ratindeu !” (2005)
- “Kî çk’ a touwé JFK ?” (2006)
- “On n' candje nén s' planete” (2007)
[candjî] Chantal Denis veyowe pa ses soçons
[candjî] li scabin del culteure di Djiblou
- Come si mwaisse persounaedje di Et mi, dji vs ratindeu, Chantal Denis a l' dår di rtrover ses raecinêyes. Tot rcwerant, ele pårtixh avou vos çou k' elle a ddja ramexhné, pal voye di ses romans, åd triviè des scoles di walon a Nameur, des emissions å posse, et si boutaedje avou l' dramatike di Lignè.
- Tantea k' elle a divnou - sins ene barbôjhe di grandiveusté - ene des fenès cnoxheuses do lingaedje di nos tåyes.
- Come escabin do Patrimoenne et do Tourisse di Djiblou, dj' a-st atôtchî sacwants côps l' Chantal, po ene racsegne u l' ôte. Tchaeke côp, dji l' a trové come pindowe å clå et dj' a discovrou ene fene kinoxheuse del sicolodjeye des djins d' nos djins.
- Kéne aweure !
Marc Bauvin, ratourné di l' adrovaedje di "Et mi, dji vs ratindeu".
[candjî] Hårdêyes difoûtrinnes
- Si pådje sol waibe di l' SLLW (e francès)
- Si pådje so l' Aberteke
