Paravang
Uit Wikipedia
De Paravang is één van de gekendste pleksjes van Blanknberge. De noame komt van ’t Fransche: paravent. ‘t Is een windscherm mè zitbankn woa dat de Blanknbergenoars en de touristn kunn genietn van ’t zicht ip de jachtoaven en ’t Leopoldpark.
De Paravang dateert uut 1908. ‘t Gebouw uut de Belle-Epoque-periode rappelleert an ’t elitair kusttourisme van ’t begun van de 20e êeuwe. De dakbedekkienge is uutgewerkt in neogotischn trant en ’t ziet er ’n bitje Ôosters uut. ’t Bestoat uut geglazeurde daktiggels en nokpannen me schelpmotief.
In 2002 is de Paravang hêlegans gerenoveerd.
[bewerkn] Paravangfêestn
Ieder joar zyn d'r paravangfêestn ip den êeste zundag van augustus. De folkloregroep "De Vrye Visscherye" demonstreert ton oude ambachtn en je kunt proeven van vasche vis. D'r zyn ook volksspelen en iptreedns van volksdansgroepn die verklid zyn in de typische kledye van de vroegere lokale visschersbevolkienge. Ook goan de Blanknbergsche reuzen ton uut.
