Jean-Marie Dedecker
Uit Wikipedia
- Dit artikel es geschreevn in 't Ostends, en da zou best ozô bluuvn.
Jean-Marie Dedecker (Nieuwpoort, 13 juni 1952) et eigelik twee leevns g'et: een as coach va Belgiës mèèst succesrieke judoka's (o.a. Gella Vandecaveye en Ulla Werbrouck) en een of polletieker. J'is geboorn in Nieuwpoort, mo nu komt 'n up as polletieker in Ostende met een eigen party: Lijst Dedecker.
[bewerkn] Judocoach
In de joarn '80 en '90 was 't 'n de bezieler va de Belgische judo: de meest bekende vanuut West-Vlams standpunt zyn nateurlik Gella Vandecaveye en Ulla Werbrouck, mo andere zien Ingrid Berghmans, Robert Van De Walle (in Ostende geboorn), Johan en Philip Laats, Harry Van Barneveld, Heidi Rakels, Inge Clement en Marie Isabelle Lomba. Tegoare en ze oegeveer 130 medailles behoald.
[bewerkn] Polletieker
Achter ze periode as judocoach is 't 'n in de polletiek gestapt, meer bepoald bie de Open VLD. Je zeg't lik oedat is, en doardeure et 'n vele gebotst met de partietop, mo agezien da'n e stemmetrekker is, durfdn ze ni teegn zn karre te rien, toet achter de gemeenteroadsverkieziengn van 2006.
Z'n oofdprobleem met de Open VLD was dat 'n voend dat die partie tevele no lienks gienk, woadeure da ze veel stemmn verloorn an't Vlams Belang. Andere zegn dat 'n tevele meedeid met de extreem-rechsche, en ze doadeure tevele in de koarte speelde. In Ostende stoend 'n tegenover Johan Vande Lanotte van de sosn. Je kost de meerderheid ni breekn.
In 2006, achter de gemeenteroadsverkieziengn, et de party beslootn - achter de klassieke Dedecker rutteliengn in de gazetn en televisje, en up vrage va Bart Tommelein in Ostende - voe Dedecker uut de VLD te smietn.
Vo ene ki zegt Dedecker nie vele: je vergoadert dat 'n zwit, ier en doar, oender andre me Hugo Coveliers en richt ne VZW en polletieke "denktank" en VZW Cassandra ip.
Ip 29 november 2006 koendigde em af dat em overstapte no de N-VA. De volgende dag al zeit de CD&V da ze 't kartel met de N-VA ni mi zaagn zittn ip die manier.
Ip 9 december koost de N-VA vo 't kartel, woarip da Jean-Marie Dedecker de party noodgedwoengn verliet. Begun 2007 kondigde ie an dat 'n een eign partij iprichtige, Lijst Dedecker, met als slogan 'gezond verstand'. By de federoale verkiezingn van 10 juni 2007 oalde Lijst Dedecker vele meer of wuk da de opiniepeiliengn agaavn: 5 kamerzetels en 1 senateur.
Jean-Marie Dedecker is ook e polletieker va stunts: in 2002 smokkelde em e journalist toe by Marc Dutroux. In 2004 oalde 'm 38% van de Open VLD stemmn in en verkiezienge voe VLD-voorzitter. Een oenverwacht oge score, gelet up 't verzet van de partietop tegen ze kandidateure.
- 1999 - 2004 Senateur
- 2004 - nu Volksvertegenwoordiger
- 2001 - nu Gemeenteroadslid Ostende