Frans Masereel
Uit Wikipedia
Frans Masereel (Blanknberge 30 juli 1889 - Avignon 3 januoari 1972) was een Vlams grafisch kunstnoare.
[bewerkn] Leven
Je wierd geboren in Blanknberge moa groeide ip in Gent woa dat 'n weunde van 1894-1911. De fabrieksstad Gent, woa dat er in die tyd vele sociaal oenrecht was en de werkmenschn under organiseerdn, ligt an de boasis van 't sociaal engagement van de kunstnoare. De stad Gent was vor em van grôot belang. J'et vele têkeningen van de stad gemakt en je wilde d'r ook begroavn wordn. Masereel krêeg z'n academische ipleidinge in de Academie vo Schône Kunstn in Gent (1907-1908) by de schilder Jean Delvin en je was een uutzounderlijk begoafd lêerling. Je reisde styf vele, ounder andere noar Iengeland, Zwitserland, en Tunesië...
Roend 1910 giengt'n in Parys weunn en kwam toevallig in contact met de outgraveure. Geïnspireerd deur anarchistische, internationalistische en pacifistische ideeën most de jounge Masereel by 't begun van den êestn weireldoorloge vluchtn noa Genève. Dienstweigeren wierd in die doagen anzien als een serieuze misdoad tegen 't voaderland. 't Deurde ton ook een joar of viftiene êer dat 'n uus land were binn mocht. De ballingschap brocht em wel in contact met een grôot dêel intellectuelen en kunstnoars met een progressieve overtuginge, lik Stefan Zweig, Herman Hesse, Thomas Mann, Romain Rolland, Klaus Mann, Kurt Tucholsky...Masereel ountwikkelde z'n vakmanschap als outsnyder vanuut een dudelik politiek, moatschappelik engagement, ounder andere als cartoonist-illustrator by kritische, progressieve, surtout pacifistische tydschriftn en als ountwerper van affiches en pamflettn. D'êeste joaren achter den oorloge wierd 'n deur de Belgische regeringe beschouwd als diensweigeroare. In 1920 gingt 'n were in Parys weunn en loater in Equihen by Boulogne.
Achter de Twidde weireldoorloge verblêeft 'n in Avignon en Nice.
Van 1947-1951 was 't 'n lêroare sierkunstn in Saarbrucken.
Frans Masereel stierf in Avignon moa wierd begroaven in Sint Amandsberg, dêelgemêente van Gent.
[bewerkn] Werk
- Je begunt me drie anti-oorlogsalbums "De doden spreken", "De doden staan op" (1917) en "De hartstocht van een mens (1918).
- In 1919 verschynt de beeldromang "Le soleil", woarin dat 'n in 'n 60-tal outsneden, de zoektocht van de mens noa 't geluk schetst gesymboliseerd deur de zunne. Ip iedere outsnede is de zunne etwoa te zien, moa oenbereikboar vo 't personnage.
- Toet 1920 lat 'n oast duusd têkeningen verschynen in 't pacifistisch tydschrift "La Feuille" woarin dat 'n de verschrikkinge van den oorloge uutbeeldt.
- J' illustreert boekn van Victor Hugo, Tolstoi, Thomas Mann, Oscar Wilde en Hemingway.
- In "De stad" (1925) beeldt 'n in 100 graveures de stad uut lik dat 'n 't zag in de joaren twintig.
- Vo de "Legende van Ulenspiegel" van Charles de Koster (1926) snydt 'n 167 graveures.
- Z'n favoriete beeldromang was "De idee". In 83 outgraveures wordt de idee in de vorm van een blôte vrouwe achtervolgd deur politie en justitie. Da boek was styf populair by de Duutsche anti-nazi's.
- In 1950 krêegt 'n ip de biennale van Venetië de Grôte Prys van de graveure.
[bewerkn] Varia
- 't Kunstenoarscentrum vo grafische kunstn in Kasterlee is noar em vernoemd.
- In Blanknberge en in Sint Amandsberg is 't er ook 'n stroate noar em vernoemd.