Vittorio Angius
Dae Wikipedia, s'entziclopedia lìbera.
(Casteddu, 1797 o 1798 - Torinu, 1862). Istòricu e zeògrafu.
[edit] Biografia
Cando fiat re Carlo Alberto, Goffredo Casalis l'at cramadu a collaborare a su Dizionario geografico, storico, statistico, commerciale degli Stati de S. M. il Re di Sardegna pro sa parte chi pertocaiat sa Sardigna. Pro custu, dae su 1832 e su 1848 girat totu s'ìsula pro si documentare; su materiale collidu fiat istadu gasi meda chi nch'aiat ocupadu prus de tres partes una de totu s'òpera de Casalis.
A pustis at collaboradu a su giornale tataresu Il Promotore, e a sa rivista casteddàrgia La Meteora.
At iscritu sa parte sarda e italiana s'Innu natzionale sardu (Hymnu sardu nationale) «Cunservet Deus su Re», musicadu dae su Maistru Giovanni Gonella, eseguidu pro sa prima bia in su teatru Tzìvicu de Casteddu su 20 freàrgiu de su 1844.
Est istadu finas diretore de su giornale Dagherrotipo. A pustis est coladu a sa diretzione de su Liceo, giornale chi aiat sustituidu su de in antis ma chi est faddidu belle deretu.
Sos cuntributos suos, mancari pòveros de crìtica e caràtere scientìficu beru, sunt pretziosos pro sa cantidade de datos subra de sas costumàntzias e sas traditziones, de sa limba, de su deretu, de s'archeologia e de s'istòria, de sa geografia e de s'economia de sa Sardigna, comente s'àtera òpera importante sua: Sulle famiglie nobili della Monarchia di Savoia: narrazioni fregiate dei rispettivi stemmi incisi da Giovanni Monneret ed accompagnate dalle vedute dei castelli feudali disegnati dal vero da Enrico Gonin publicada in Torinu in su 1841-57.
In su 1848 est eletu deputadu in su collègiu de Lanusè.
