Pennsilfaanisch-deitsche Folk Culture
Aus Wikipedia
En latt vun die Folk Culture vun die Pennsylvaanisch-Deitsche wie wie sell vun die Leit in die Pfalz im alte Land, abbadich die alte Gebreiche. In Pennsylvaani henn sie Faasnacht, Oschtre mit dem Oschterhaas. Yaahre zerick iss an Grischtdaag der Belznickel kumme zu die Kinner, en wieschter Kall, ass awwer doch Bressents gebrocht hot.
Grundsaudaag iss im neie Land am zwett Hanning. Im alte Land wisse sie aa ebbes vun dem alte Gebrauch: "Wann der Dax (odder der Fuchs) sei Schadde sehnt am zwett Hanning (Mariae Lichtmess), bleibt der Winter noch sex Woche." Awwer en Event wie im neie Land mit all die Grundsau Lodsches und die Versammlinge henn sie im alte Land net. Sie mache kenn grooss Wese devun.
Im alte Land wisse die Leit nix vun Hexezeeche (hex signs), wu gemolt warre uff Scheiere in Pennsylvaani. Awwer Braucherei kenne die ganz Alte noch in die Pfalz. Sell iss aa geduh warre Yaahre zerick. Soweit mer wisse, gebt's noch deel Braucher in Pennsylvaani.
En paelzer Gedier, wu dief im Busch lebt un aarick bleed iss, iss 's Elbedritsch. Awwer scheint's henn deel Leit sie g'fange un mitgenumme ins neie Land, wie sie abg'schtaert sinn un gezogge naach Pennsylvaani. Weil sitter die Zeit, wu's Paelzer hot im neie Land, gebt's aa Elbedritschlicher. Awwer sie sinn immer noch hatt zu fange.
Noch ganz lewendich is im neie Land die "Oral History Tradition". 'S gebt etliche wunnerbaare Pennsylvaanisch-Deitsche Schtoris, as verzehlt warre, wann Pennsylvaanisch-Deitsche zamme kumme.
