SANSANAGEO SO BILAY
From Wikipedia
Sansanageo labat so benben ya bilay
Silonget na labi sibuake’y ombotay
Kapepegyan imis, liket ya sampegtao
Onselek so banua, linaoa’y nataotao
Say manlikna’y irap agto makaugip
Pitalaran to may onsabin mapilit
Kagulis ya sinag, lioaoan mayumis
Ya mangiparongtal na banoan manimis.
Ta ontay inkianak na ugao diad mundo
Inan nampasikal ilingoa’y otot to
No narengel to la’y onaan ya anggo
Na melag ya ugao bunga’y panangaro.
Say toon ugao ni tarok toy liglioa
Na saray ateng to panon may irap da
Say imis tan kampay, amil may salita
Makapalingoan ed kesao mo tan paga.
Balet no ombaleg so ugao ya nikuan
Napalakao to lay diad ateng onsugnar
Say kaoayangan to’y labay ton narandan
Anggan erme’y ateng pilit to'y onlamang.
Ta singa may banoan ondadalangirang
Ansakit ed baog nepeg mon sakbongan
Anggan say tanaman no masyado'y petang
Say banoa aoit to'y kilenes, kilaylay.
No ugto lay ageo banoa'y ontayagtag
Pilit ton pagyaoe'y pinalsa ran lapag
Ta ontan so toon kasil toy iyagyag
Singa ag naratnga’y patey man no irap.
Ontobo'd linaoa’y inkapasirayeo
Ta nalingoanan toy nanlapuan ton inggeo
Balet no nasabi so oras na ngarem
Ompaniring la diay ikuyep na sileo.
Mankabaskabas lay marmarlang ya ageo
Onkebet, onlopok so toon maregkel
Alimbaoa to ya’y bilay tin saksakey
Oalay iseselek, napaso, napater.
Ompelnak, ombotay so toon oay bilay
Ombaleg, ondegkel ya manlanglangalang
Nasabi so ngarem onodiem lay lirang
Mankalnan onlaknab so patey tan tigoay.
(4 November 2006)
