Lengas eurasiaticas
Un article de Wikipèdia, l'enciclopèdia liura.
Lei lengas eurasiaticas (o l'eurasiatic) son una superfamilha de lengas ipotetica, que certanei lingüistas coma Joseph Greenberg e Meritt Ruhlen defendon son existéncia, maugrat lo scepticisme d'autrei lingüistas. L'eurasiatic seriá fòrça ancian e fòrça vast. S'espandiriá en Euròpa, dins l'oèst e lo nòrd d'Asia e dins l'extrèm nòrd d'America. Englobariá lei familhas de lengas seguentas:
- lei lengas indoeuropèas, en Euròpa e dins l'oèst d'Asia (que l'occitan ne fa partida),
- l'anciana lenga etrusca, en Itàlia,
- lei lengas oraloiokaguiras (oralic e iokaguir), dins l'èst d'Euròpa e lo nòrd d'Asia,
- lei lengas altaïcas (turqués, mongòl e tongoz), dins lo centre d'Asia e l'èst d'Euròpa,
- lei lengas corèonipoaino (corean, japonés e aino), dins lo nòrd-èst d'Asia,
- lo guiliak o nivkh, dins lo nòrd-èst d'Asia,
- lei lengas chokchi-kamchadal, dins lo nòrd-èst d'Asia,
- lei lengas esquimaudas-alèutas, dins l'extrèm nòrd d'America.
L'eurasiatic coïncidís en granda part amb una autra superfamilha ipotetica: aquela dei lengas nostraticas, supausada per d'autrei lingüistas que Greenberg. Lo nostratic compren parcialament lei meteissei familhas que l'eurasiatic, mai en i apondent l'afroasiatic, lo sud-caucasenc e lo dravida e en i levant l'etrusc, lo japonés, l'aino, lo guiliak, lo chokchi-kamchadal e l'esquimaud-alèuta. Pasmens, lei darrierei versions de l'ipotèsi nostratica an evolucionat e ara se sarran de mai en mai de l'ipotèsi eurasiatica.
Joseph Greenberg comencèt de concebre l'ipotèsi eurasiatica dins lo mitan deis ans 1960, la rendèt publica per tròç dins leis ans 1990 e ne faguèt una publicacion detalhada en 2000.
[Modificar] Bibliografia
- GREENBERG Joseph (2000) Indo-European and its closest relatives, Stanford: Standord University Press
