Equinòcci
Un article de Wikipèdia, l'enciclopèdia liura.
L'equinòcci es cadun dels dos moments de l'an que lo solelh crosa l'eqüator celestial. Durant los equinòccis, la nuèit e lo jorn an la meteissa durada pertot dins lo mond. Lo mot equinòcci ven del latin e significa "nuèit egala". I a dos equinòccis dins l'an,
- L'equinòcci de prima o equinòcci vernal se produís a l'entorn del 21 de març quand lo Solelh crosa l'eqüator celestial, passant de l'emisfèri sud al nòrd. La declinason solara es zero passant de negativa a positiva. Dins l'emisfèri nòrd marca la debuta de la prima.
- L'equinòcci de tardor se produís a l'entorn del 23 de setembre quand lo Solelh crosa l'eqüator celestial passant de l'emisfèri nòrd al sud. La declinason solara es zero passant de positiva a negativa. Dins l'emisfèri nòrd marca la debuta de la tardor.
Dins l'emisfèri sud, aquestes noms s'intercambian.
Los equinòccis tanben se podon considerar coma dos punts dins lo cèl. Son los punts ont l'eqüator celestial copa l'ecliptica. En astronomia, aquestes punts son los nodes orbitals de la Tèrra. Se nomenan punt Aries o punt vernal (l'equinòcci de prima) e punt Libra (l'equinòcci de tardor). Lo moment que lo Solelh passa pels punts equinoccials se pòt calcular precisament e l'equinòcci se produís durant un instant concret dins lo temps. En diferents punts de la Tèrra los equinòccis se podon produire en de datas diferentas degut als diferents fuses oraris
