Блог

Од Википедија, слободна енциклопедија

Блог (англиски: Blog), кованица од изразот „веб лог“ (web log), е веб-сајт во кој се објавуваат датумски определени дополнувања со редовен ритам и се прикажани во обратен хронолошки редослед (најновиот најгоре). Терминот блог е скратеница од веб-лог (weblog, web log), термин чие буквално значење е „дневник на веб“.

Пишување или одржување на блог, или додавање на напис се нарекува „блогирање“. Одделните написи на блог се нарекуваат „постови“, а личноста која ги објавува се нарекува „блогер“. Блог може да се состои од текст, хипертекст, слики, линкови, како и можност за оставање коментари. Често даден блог има посебна тема или област која ја покрива, додека пак некои се наменети за дискутирање на лични искуства.

Блоговите може да бидат поставени на посебни сервиси за хостирање блогови, или да бидат дел од веб-сајт кој работи благодарение на посебен блогерски софтвер. Блоговите како медиум стекнаа популарност и значење на почетокот на 21 век, промовирајќи го концептот на граѓанско новинарство.