ກາບກອນ

ຈາກ ວິກິພີເດຍ

ກະລຸນາຊ່ວຍ ປັບປຸງ ບົດຄວາມ ຫຼື ພາກນີ້ ໂດຍ ການຂະຫຍາຍມັນອອກຕື່ມ. ການສົນທະນາກັນ ອາດຈະມີ ຢູ່ ໜ້າສົນທະນາ ຫຼື ຢູ່ ຂໍໃຫ້ຂະຫຍາຍ.

[ດັດແກ້] ຮອຍຍີ້ມນະຄອນຫລວງ

ໂດຍ: ນ.ສ.ພ ວຽງຈັນໃໝ່

• ເມືອງວຽງຈັນແດນລ້ານຊ້າງ............ສົມຊື່ນະຄອນຫລວງ

ເມືອງອູ່ອະລິຍະທຳ............................ຮຸ່ງເຮືອງເຫລືອງເຫລື້ອມ

ເມືອງທີ່ມີມູນເຊື້ອ..............................ວັດທະນະທຳ ໂດດເດັ່ນ

ເມືອງພັດທະນາຮອບດ້ານ...................ບໍ່ມີເສົ້າເຊື່ອມສີ

• ຕົກມາໃນຍຸກນີ້...............................ແຫ່ງເຕີບໃຫຍ່ຂະຫຍາຍຕົວ

ດ້ານເສດຖະກິດ ວັດທະນະທຳ ສັງຄົມ........ກໍວ່ອງໄວຈະເລີນກ້າວ

ສຳນັກງານ ເຮືອນຫລາຍລົ້ນ....................ຕຶກລຽນກັນນ້ອຍໃຫຍ່

ຫົນທາງທຽວຈາກບ້ານເຫນືອສູ່ບ້ານໃຕ້.........ຂະຫຍາຍກວ້າງຕໍ່ເຕີມ.

• ພຣະທາດຫລວງຕັ້ງຜ່ານຟ້າ...............ຢືນສະຫງ່າຢູ່ກາງເມືອງ

ປະຕູໄຊກໍຮຸ່ງເຮືອງ...............................ສະອາດຕາເອົາແທ້

ລອງແວ່ເຢືອນແວ່ຢ້ຽມ............................ສວນສາທາເຈົ້າຟ້າງຸ່ມ

ຄ່ຳຄືນມີແສງໄຟຮຸ່ງແຈ້ງ..........................ຂຽວເຂັ້ມອຸ່ມງາມ

• ວັດສີສະເກດ ວັດພະແກ້ວ...................ຄຽງຄູ່ວັດທາດຫລວງ

ວັດອິນແປງ ວັດສີເມືອງ..........................ວັດຈັນ ວັດອົງຕື້

ວັດອຸມຸງ ລືຊາລ້ຳ.................................ວັດຊຽງຍືນ ວັດເກົ້າຍອດ

ລ້ວນແຕ່ສັກສິດທິເດດກ້າ........................ຊາວພຸດໄຫວ້ນົບເຖິງ

• ສວນເຍົາວະຊົນຕັ້ງມໍ່ໃກ້.......................ແປະເດີ່ນພຣະທາດຫລວງ

ບ່ອນທ່ອງທ່ຽວທີ່ສວຍງາມ.........................ແກ່ເຍົາວະຊົນນ້ອຍ

ໄອເຕັກ ຮ້ານສັບພະສິນຄ້າ........................ໂຮງແຮມດອນຈັນກໍນັບຫນຶ່ງ

ຕະຫລາດແລງ-ຕະຫລາດເຊົ້າ.....................ຄົນທຽວເຂົ້າອັ່ງອໍ

• ຕົກມາຮອດຍຸກກ້າວ............................ລາວຮັ່ງລາວມີ

ຍ້ອນການນຳນະຄອນຫລວງ........................ຊີ້ຊ່ອງທາງຫລາຍດ້ານ

ປະຕູເມືອງກໍໄຂອ້າ...................................ການໄປມາກໍເປີດປ່ອງ

ຕ່າງປະເທດຫລັ່ງເຂົ້າ...............................ໂຮມເຕົ້າຢູ່ເມືອງ

• ກອງປະຊຸມອາຊຽນແຕ່ລະຄັ້ງ...................ຊາວໂລກກ່າວສັນລະເສີນ

ກຽດສັກສີຂອງລາວ...................................ໂດ່ງດັງໄກກ້ອງ

ປະເທດລາວ ປະເທດນ້ອຍ...........................ແຕ່ຄົນລາວຊ້ອຍຊື່ນ

ປວງຊົນລາວໃຫຍ່ນ້ອຍ................................ຊູຊວ້ານຊ່ວຍກັນ

• ທຸງສາມສີວົງເດືອນຫມາຍຈ້ຳ....................ປິວເວີ່ນກາງເວຫາ

ສັນຍາລັກຫມາຍເຖິງ..................................ເຂດແດນເມືອງລາວກວ້າງ

ເມືອງລາວເຕັມໄປດ້ວຍ...............................ຄວາມສະຫງົບສັນຕິພາບ

ເອກະລາດພຽບພ້ອມ...................................ຄົງຫມັ້ນຄູ່ສະຖຽນ

• ເຊີນເດີ ເຊີນເຜົ່າພົງພີ່ນ້ອງ......................ເຊີນທ່ຽວນະຄອນຫລວງ

ມາສຳຜັດກັບຄວາມງາມ...............................ຮຸ່ງເຮືອງຈະເລີນກ້າວ

ສົມຊື່ວຽງຈັນເຈົ້າ.......................................ເມືອງຫລວງນະຄອນເອກ

ຊາວລາວເຮົາພີ່ນ້ອງ..................................ຍິນດີຕ້ອນຮັບເອົາ

• ຊາວເມືອງຫລວງໃຈກວ້າງ.....................ໃຈເພື່ອແຜ່ອາລີຫາ

ຕໍ່ແຂກໄກໄທມາ.......................................ຈັກຈີນ ມຽນມາ

ຄົນເມືອງຫລວງເຮົານີ້................................ໃຈດີເວົ້າກໍມ່ວນ

ຮັບແຂກເມືອງແຂກບ້ານ..............................ຍໍຍີ້ມກ່ອນຈາ ທ່ານເອີຍ....

[ດັດແກ້] ສາມະຄີລາວເອີຍ

ແຕ່ງໂດຍ: ຊ.ວົງໂສພາ

• ແມ່ນຢູ່ສຸດຂອບຟ້າ............. ປະເທດອື່ນເມືອງໃດ

ລາວກໍ່ຍັງເປັນລາວ..............ບໍ່ແບ່ງປັນພັນເຊື້ອ

ລາວທັງເໜືອທັງໃຕ້.............ລາວກາງສຳພັນກ່ຽວ

ລວມໜຶ່ງດຽວຮ່ວມສ້າງ...........ແປງບ້ານໃຫ້ຮຸ່ງເຮືອງ

• ຢ່າໄດ້ຫາເລື່ອງເວົ້າ........... ບິແບ່ງສາມະຄີ ເຮົາເນີ

ລາວທັງຜອງປອງດອງກັນ........ ສ້າງສາຍສຳພັນໄວ້

ລາວທັງໃດກໍ່ລາວແທ້.......... ຢ່າຜັນແປແຍກແບ່ງ

ທານນ້ຳໃຈຢ່າແຫ້ງແລ້ງ........ ໃຫ້ໄຫລລົ້ນບໍ່ຂາດສາຍ

• ເຮົາເປັນເໝືອນນ້ອງອ້າຍ.......ເກີດຮວ່ມສາຍອຸທອນ

ມາຕຸພູມດິນລາວ..............ບ້ານແມ່ເຮົາຈິງແທ້

ເຊື້ອສາຍລາວເດີມເຄົ້າ..........ຂຸນບູຣົມອີ່ພໍ່ໃຫຍ່

ໃສວ່າລາວຕ່າງປ້ອງ...........ພົງເຊື້ອຕ່າງກັນ

• ແມ່ນຊິໄກຈາກບ້ານ...........ພາກຖິ່ນດິນລາວ

ຄົນລາວໄປຫົນໃດ............ເຂົ້າໜຽວກໍ່ໄປພ້ອມ

ສຽງແຄນສຽງຊໍອູ້.............ຟັງດູຍັງອອ້ຍອິ່ນ ຢູ່ເດ

ໃຈຖຫວິນຮັກໝັ້ນ.............ເມືອງບ້ານບໍ່ນ່າຍແໜງ

• ຄຳບູຮານກ່າວແຈ້ງ...........ໃຫ້ລາວຮ່ວມສາມະຄີ

ມີມາໃນຄຳກອນ..............ບອກສອນເອົາໄວ້

ເພິ່ນວ່າ"ຂໍໃຫ້ສາມະຄີໄວ້........ຄືເຂົ້າໜຽວໜຶ້ງໃໝ່

ຢ່າໄດ້ເພແຕກມ້າງ............ຄືນ້ຳຖືກເຂົ້າໜຽວ" ພີ່ນ້ອງເອີຍ.