Vriethof (Mestreech)
Van Wikipedia
Dit artikel is gesjreve in 't Mestreechs. 't Weurt gewaardeerd óm in dit artikel 't Mestreechs aan te hauwe of aan te gaeve welk anger dialek gebroek is.
De Vriethof (Nederlands Het Vrijthof) is 'ne groete plei in 't centrum vaan Mestreech, dee bekind steit um de väöl historische gebouwe en kaffees die drum stoon. Mèt vastelaovend is de Vriethof 't centrum vaan de vastelaovendsfestiviteite; bekind is de ceremonie vaan 't lufte vaan 't Mooswief. Ouch weurt 'r dèks gebruuk veur manifestaties, wie opelochconcerte (zuug ouch André Rieu).
[bewirk] Bezeensweerdeghede en bekinde gebouwe
- De Sintervaoskèrk, 'n Roemaonse kèrk oet de daartiende iew;
- De Sintjanskèrk, 'n Gotische kèrk oet de vieftiende iew, allewijl protestants;
- 't Ginneraolshoes, woe-in allewijl 't Theater aon de Vriethof gevesteg is;
- De Militair Hoofwach, 'n achtiende-iews, classicistisch gebouw mèt prommenaad;
- 't Spaons Gouvernemint;
- 't Hoes In den Ouden Vogelstruys, allewijl 'ne bekinde kaffee
[bewirk] Historie
De Vriethof is oontstoon es veurhof (vriethof) vaan de Sintervaoskèrk. In de Roemeinsen tied laog 't waorsjijnlik zjus boete de stad, es e stök naat gaarsland aon de Maos. Mèt de greuj vaan de Sintervaoskèrk woort 't lankzaamaon 't centrum vaan de stad. Roond 't jaor 1000 woort aon de Vriethof 'ne palts opgeriech, dee naoventrint 200 jaor stand zouw hawwe; in of um 1224 maakden 'r plaots veur e kloester: 't Wittevrouwekloester. Nog ind dezelfden iew volgden e Dominicanerkloester. In dezelfden tied woort ouch de Sintervaoskèrk wie me die noe kint, in hoegroemaonse stiel, opgebouwd (tories kaome roond 1225 veerdeg). De Sintjanskèrk volgde tösse 1450 en 1480.
De meiste bebouwing aon de Vriethof stamp oet de achtiende en negentiende iew. De Hollandse ginneraol Cornelis Dibbets woort d'n ierste bewuner vaan 't Ginneraolshoes, wat op de fundaminte vaan 't Wittevrouwekloester opgetrokke woort.
In 2003 oondergóng de Vriethof 'n ingriepende verbouwing, boemèt in 't vastelaovendsleedsje vaan dat jaor gespot woort.
