Troeën va Karel de Groete
Van Wikipedia
Dit artikel is gesjreve in 't Norbiks. 't Weurt gewaardeerd óm in dit artikel 't Norbiks aan te hauwe of aan te gaeve welk anger dialek gebroek is.
In d'r Dom va Aoke vindt me op d'r oksaal d'r kunningstroeën va Karel de Groete. Vanop dizze troeën zow d'r keizer van 't Heilige Roomse Riek de misdeenste biegewond ha. D'r troeën is gemakt va wit-gael marmere plate, die aafkomstig zowwe zieë oet 't Heilige Laand en dao gedeend howwe es pleinvloer vör d'r taempel in Jeruzalem. Es me vör d'r troeën sjteet dan kint me an d'r leenkerkaant de in-kerving van 'n mäölesjpèl herkenne en dat sjpèl waoërt roond 't begin van os jaortilling dör Romeinse soldaote väöl gesjpeld in Jeruzalem, al zittend op d'r groond. Volges de uvverlievering zow Jezus eeges nog uvver dae
vloer gelope kinne ha. Es Karel de Groete op d'r troeën wol plaatsjnaeme, da gong e de marmere trepkes op, driejde zich um en gong zich zitte op de hote plaank die zich tussje de marmere plate bevingt. Och die traptraejes wieëre aafkomstig oet 't Heilige Laand. Karel de Groete is in d'r 12de ieëw heilig verklaord en d'r Dom va Aoke waor lang 'n baevaartplaatsj. De baevaarder howwe 't gebruuk um, ter vergaeving van de zung, minnige kieër oonder d'r troeën dör te kroepe. De vurm van d'r troeën lut vermoede dat-e och mit die raej zjuus zoe geboewd is. Achter d'r troeën bevindt zich 'n saoërt altaar.
