Theo van Gogh

Van Wikipedia

Dit artikel is gesjreve in 't Valkebergs. 't Weurt gewaardeerd óm in dit artikel 't Valkebergs aan te hauwe of aan te gaeve welk anger dialek gebroek is.

---

Theo van Gogh (23 juli 1957 - 2 november 2004) waor 'ne Nederlandse regisseur, televisiemeker en columnis.

Van Gogh woort gebore in D'n Haag. Hae sjtudeerde korte tied rechte in Amsterdam, meh sjtopde veurtiedig mèt dees sjtudie. Hae melde ziech e twiè kièr aan bie de Nederlandse Filmacademie, meh woort neet toegelaote. In 1982 maakde hae es autodidak zien debuut es filmregisseur mèt de film Luger. Veur zien films Blind Date (1996) en In het belang van de staat (1997) wón hae e Gouwe Kauf. Van Goghs films waore meistal low-budgetproducties; naodat films wie 06 en Blind Date succesvol bleke, waore producente èvvel miè geïnterseerd um geld in zien films te sjteke. Vanaaf de jaore tachtig waor Van Gogh ouch in versjillende films te zeen es acteur, presenteerde hae televisieprogramma's en sjreef (dèks controversieel) columns veur tiedsjriefte. Ouch publiceerde hae 'n aantal beuk.

Van Gogh sjtong in Nederland bekènd es "enfant terrible". Hae deeg dèkser provocerende utinge in de media; ouch de multicultureel sameleving en de Islam woorte, saer de jaore neugetig, door häöm nogal ins bekritiseerd. Van Gogh waor lid van 't Republikeins Genootsjap en bie de verkezinge veur de Twiède Kamer in 2003 sjtumde hae op VVD-politica Ayaan Hirsi Ali. Same mèt häör maakde hae ouch ein van zien lètste films, Submission, euver 't verband tösje bepaalde interpretaties van de Koran en vrouwemieshandeling. Naodat deze film woort oetgezónde in 't televisieprogramma Zomergasten, woorte zoawaal Van Gogh es Hirsi Ali mèt d'n doad bedreig.

Op 2 november 2004 woort Van Gogh vermaord in de Amsterdamse Linneaussjtraot. Van Gogh woort getroffe door 8 keugel, woanao ziene kael doorgesjneje woort en de dader mèt e mets 'ne ope breef in zie lichaam vasmaakde. De maordenaer waor Mohammed Bouyeri, 'ne 26-jaorige Amsterdammer mèt zoawaal de Marokkaanse es de Nederlandse nationaliteit. Bouyeri woort gearresteerd en op 26 juli 2005 woort hae veroordeild tot leveslang gevangenissjtraof. Oet de breef dae op Van Goghs lichaam woort achtergelaote, en 'ne aafsjeidsbreef dae Bouyeri bie ziech droog, bliek dat hae oet radicaal-islamistische euverwaeginge haet gehandeld.

[bewirk] Filmografie

• Luger (1982)
• Een dagje naar het strand (1984)
• Charley (1986)
• Terug naar Oegstgeest (1987)
• Loos (1989)
• Vals licht (1993)
• Ilse verandert de geschiedenis (1993)
• 06 (1994)
• Reunie (1994)
• Eva (1994)
• Een galerij: De wanhoop van de sirene (1994)
• De Eenzame Oorlog Van Koos Tak (1995)
• Blind Date (1996)
• Hoe ik mijn moeder vermoordde (1996)
• In het belang van de staat (1997)
• Au (1997)
• De Pijnbank (1998)
• Baby Blue (2001)
• De nacht van Aalbers (2001)
• Najib en Julia (2002)
• Interview (2003)
• Zien (2004)
• Submission (2004)
• Cool (2004)
• 0605 (2004)
• Bad (ónvoltoajd)

[bewirk] Extern linke

•  Theo van Gogh oppe Internet Movie Database