Katsushika Hokusai
Van Wikipedia
Dit artikel is gesjreve in 't Valkebergs. 't Weurt gewaardeerd óm in dit artikel 't Valkebergs aan te hauwe of aan te gaeve welk anger dialek gebroek is.
Katsushika Hokusai (Japans: 葛飾北斎) (waarsjienlik 31 oktober 1760 - 10 mei 1849) waor 'ne Japanse kunstenaer. Hae maakde ukiyo-e-prènte (Japanse houtsjniejdruk). Hokusai haet binne alle genres van ukiyo-e gewèrk, meh 't bekènds ies 'r gewore door zien landsjappe. Zien bekèndste werke zint de Zèsendaartig ziechte op de berg Fuji. Wiejer haet 'r ouch erotische prènte gemaak.
Hokusai woort gebore in Edo (noe Tokio) in de neugende maond van 't tiènde jaor van de Horeki-periode. Euver zien ouwersj ies nieks bekènd. Wie 'r drie jaor waor woort 'r geadopteerd door Nakajim Ise, dae sjpegele maakde veur 't hof van de Shogun. Mèt 18 jaor, wie 'r al get ervaring houw mèt houtsjniejwerk, begoes 'r in 't atelier van de Ukiyo-e-kunstenaer Katsugawa Shunso, dae gesjpecialiseerd waor in portrètte van acteursj, te wèrke. Hae maakde dao ein serie portrètte onder de naam Katsukawa Shunrô. Umdat hae 't in artistiek opziech neet eins waor mèt ziene leraar, moos hae in 1785 weg oet't atelier.
Hienao brook eine tied van ermhooj aan veur Hokusai. Hae bleef waal sjtudere öm ziech in artistiek opziech te verbetere.
Hokusai maakde bookillustraties en houtsjniejdrukke mèt es ónderwerpe 't dageliks leve in Japan, de tradities en de legendes. Zien bekèndste werke creëerde hae nao zien zestigste. In 1831 maakde hae de Fugaku Sanjûrokkei oftewaal de Zèsendaartig ziechte op de berg Fuji. Hae gebruukde hie-in de kleur prusesj blauw, die me in Japan pas koes vanaaf 1829. In 1834 maakde hae nog ins Hónderd ziechte op de berg Fuji.
Hokusai sjtorf op 10 mei 1849. Hae leet 30.000 werke nao. Zien lètste weurd zouwe zin gewaes:"Nog vief jaor en iech zou 'ne groate arties gewore zin."
[bewirk] Invlood
In de neugetiènde ièw waor Japanse kuns in kunstenaersjkringe erg in trèk. Onder andere Claude Monet, Vincent van Gogh en Paul Gauguin woorte beïnvloed door Hokusai.
