Gerlach Cerfontaine
Van Wikipedia
Dit artikel is gesjreve in 't Valkebergs. 't Weurt gewaardeerd óm in dit artikel 't Valkebergs aan te hauwe of aan te gaeve welk anger dialek gebroek is.
Gerlach Cerfontaine (Houtem, 28 november 1946) ies 'ne Nederlandse topman. Hae ies bekènd es de algemein directeur van de Schiphol Group.
Cerfontaine sjtudeerde geneeskunde in Utrech. Nao zien aafsjtudere in 1972 wèrkde hae es hoesarts, verloskundige in Indonesië, sjtudente-arts, en sjeepsarts. Ouch volgde hae vanaaf 1978 nog 'n opleijing tot psychotherapeut. Hae woort in 1980 directeur van e psychiatrisch hospitaal in Utrech, 't Willem Arntzhuis. Cerfontaine woort in 1986 beneump tot directeur patiëntezörg van 't Academisch Hospitaal Utrech, es opvolger van Els Borst, woa hae in de jaore daonao veurzietter van de directie en vervolges veurzietter van de raod van besjtuur woort. Ouch waor hae hoagleraar strategisch management in de hospitaalzörg in Utrech.
In 1998 woort Cerfontaine president-directeur van 't vleegveld Schiphol. Hae haet ziech veural beziggehouwte mèt de aanlèk van 'n viefde sjtart- en landingsbaan, de Polderbaan, die in 2003 geëupend woort. Ouch de privatisering en beursjgank van Schiphol ies e belangriek sjpeerpunt van zie beleid. 't Veursjtèl tot gedeiltelike privatisering ies, nao jaorelang discussies, op 1 juli 2005 aangenomme door de Twiède Kamer. Cerfontaine kaom ouch dèks ónder vuur te liegke, mèt name vanwege de geluidseuverlas van Schiphol.
In 2003 woort Cerfontaine door D66 gevraog veur de pos van minister van Economische Zake in 't kabinet-Balkenende II, naodat hae ièrder - bie de vörming van 't twiède Paarse kabinet - getip waor es minister van Volksgezóndheid. Hae bedankde vanwege de sjlechte pensioanveurzieninge veur ex-ministersj. Cerfontaine ies noats lid gewaes van 'n politieke partie. In 2004 woort haet geneump es nuje veurzietter van de werkgeversjorganisatie VNO-NCW.
Cerfontaine ies getrouwd mèt de televisiepresentatrice Pia Dijkstra en haet 3 zone.
