Fahd bin Abdul Aziz
Van Wikipedia
Dit artikel is gesjreve in 't Mestreechs. 't Weurt gewaardeerd óm in dit artikel 't Mestreechs aan te hauwe of aan te gaeve welk anger dialek gebroek is.
Fahd bin Abdul Aziz as-Saûd (Ar-Riyâd, waorsjijnlik 1923 - aldao, 1 augustus 2005) waor keuning vaan Saoedi-Arabië vaan 1982 tot 2005. Heer waor ein vaan de 37 zäöns vaan Abdul Aziz as-Saûd, de stiechter vaan Saoedi-Arabië.
Fahd woort waorsjijnlik in 1923 gebaore. Heer góng in de jaore daarteg nao de Riyaadse Prinsesjaol, die speciaol door ziene pa veur lejer vaan 't Keuninklik Hoes waor opgeriech. Ouch studeerde heer in Mekka aon 'n madrasa.
In 1953 woort heer door ziene pa beneump tot minister vaan oonderwies. In 1959 leide heer de Saoedische diplomatieke delegatie nao de opriechting vaan de Arabische Liga. Dat illustreerde ziene touwnummende invlood.
Wie in 1975 keuning Faisal bin Abdul Aziz vermaord woort en opgevolg woort door Chalid bin Abdul Aziz, woort Fahd de kroenprins. Dao deende heer de facto es premier. In 1982 storf Chalid in vrei en volgde Fahd häöm op.
Es keuning heet Fahd veural väöl veur de boetelandse pólletiek beteikend. Zoe lökden 't häöm 'n ind te make aon d'n oorlog in Libanon, en hólp heer de Vereinegde Staote bij hunnen oorlog in Irak in de vreug jaore negeteg. Dit kaom häöm op fel kritiek te stoon in eige land en väöl extreem moslims perbeerde häöm sinsdeen mèt attentaote te verdrieve. De lèste jaore waor Fahd es gevolg vaan 'n haartattak neet mier actief en leet heer 't regere euver aon zie haafbroor kroenprins Abdullah bin Abdul Aziz. Deze woort bij zien euverlije in 2005 tot de nuie keuning gekruund.
