Robin Cook
Vu Wikipedia, der fräier Enzyklopedie.
De Robin Cook gebuer den 28. Februar 1928 zu Glasgow, a gestuerwen de 6. August 2005 op engem Trëppeltour a Schottland) war e schotteschen a britesche Politiker.
Hien ass an de Biergaarbechter-Faubourge vu Glasgow, als Fils vun engem Chemiker, op d'Welt komm an opgewuess, a war vun 1974 bis 1983 Deputéierte vun der Labour Party an der Chamber of Commons vum britesche Parlament. Ënnert dem Neil Kinnock huet hie sech als ee vun de wichtegste Personnagen an der Oppositiounspartei profiléiert. Den Tony Blair, deen en ëmmer als "politescht Liichtgewiicht" ugesinn huet, huet em trotz senger Antipathie 1997 de Poste vum Ausseminister a senger Regierung ginn (virun allem, fir dem Gordon Brown e Géigegewiicht ze setzen).
Als Ausseminister huet de Cook säi Ministère moderniséiert, prestigiéis, mee iwwerflësseg Ambassaden zougemaach, an duerchgesat, dass ethesch Critèren, op éischter Plaz d'Anhale vun de Mëschrechter, bei der Aussepolitik sollte gëllen. Hien huet sech an der Regierung als iwwerzeegten Europäer gewisen, an huet sech fir de britesche Bäitrëtt zum Euro agesat. Och fir eng verstäerkt europäesch Verdeedegungspolitik huet hie militéiert.
An der 2. Blair-Regierung gouf de Cook net méi op e Ministerposten ernannt, dofir gouf e President vum britesche Parlament. International grouss Beuechtung krut en, wéi en de 17. Mäerz 2003 vun dësem Posten zeréckgetrueden ass, fir géint d'Participatioun vu Groussbritannien am Irakkrich ze protestéieren. "Firwat", sou sot en, "soll et op eemol esou drénglech sinn, dass mer eis an e Krich missten engagéieren fir eng Militärmuecht z'entwaffnen, déi et zanter 20 Joer gëtt an déi mer mat opgebaut hunn?"
