Ordre de la Couronne de Chêne
Vu Wikipedia, der fräier Enzyklopedie.
Den Ordre de la Couronne de Chêne ass e lëtzebuergesche Verdéngschtuerden.
En ass agefouert gi vum Groussherzog Wëllem II. deen och Kinnek Wëllem II. vun Holland war, am Joer 1841, zu der Zäit wou Lëtzebuerg zwar een eegestännesche Staat war, awer a Personalunioun mat Holland deeselwechte Monarch hat. Obschonn den Uerden ee reng lëtzebuergesche war, huet de Wëllem II. en dacks gebraucht fir Hollänner ze dekoréieren. Domat konnt en d’Kontroll vun der hollännescher Regierung beim Ausdeelen vun Gielecher iwwergoen. En huet der awer net méi wéi drësseg ausgedeelt. Säi Nofolger de Wëllem III. hat do méi eng large Vu. Hien hat der eleng um Dag vu senger Kréinung 300 ausgedeelt, an nach honnerten an de Joren duerno. Et waren der souvill datt souguer d'Hollänner gemengt hun et wier een hollänneschen Uerden.
Wéi d'Kinnigin Wilhelmina op den Troun koum war et domat erriwwer, wëll an deem Ament d'hollänesch Kinneken net méi Monarche vu Lëtzebuerg waren. D’Hollänner hun dunn zwee nei Uerden agefouert: den Uerden vum Haus Oranien-Nassau an den Hausuerde vun Oranien.
Zanter dem Groussherzog Adolphe war den Uerden nëmmen nach just fir Lëtzebuerger Bierger do, heiandsdo hunn awer och Auslänner den Uerde kritt, haaptsächlech Membere vu kinnekleche Familjen.
De Groussherzog vu Lëtzebuerg ass Grand-Maître de l’Ordre.
Den Ordre de la Couronne de Chêne ass an 8 Graden opgedeelt:
- Grand-Croix
- Grand-Officier
- Commandeur
- Officier
- Chevalier
- Médaille en vermeil
- Médaille en argent
- Médaille en bronze
