Europäesche Conseil

Vu Wikipedia, der fräier Enzyklopedie.

Den Europäesche Conseil (och alt "EU-Sommet" genannt) bréngt d'Staats- a Regierungscheffe vun der Europäescher Unioun (EU), hir Ausseministeren an och de President vun der Europäescher Commissioun zesummen. Hie leet déi allgemeng politesch Orientéierunge vun der EU fest a spillt domatter eng decisiv Roll doranner, wéi a wuer d'EU sech entwéckelt, wat hier Prioritéite sinn, asw.

[Änneren] Organisatiounsform

Den Europäesche Conseil kënnt gewéinlech 4 Mol am Joer zesummen, kann awer vun der Présidence vum Conseil vun der Europäescher Unioun zu aussergewéinleche Sommetën zesummegeruff ginn, wann d'Actualitéit dat erfuerdert. President ass dee Staats- oder Regierungschef, deem säi Land grad d'Présidence huet. Matt der Roll vum President si keng eege Pouvoirë verbonnen, hien organiséiert de Sommet an emfänkt seng Kollegen.

Zanter 1969 sinn d'Staats- und Regierungscheffen an onregelméissegen Ofstänn zesummekomm. 1974 sin se d'accord ginn, dëst vun elo un regelméisseg ze maachen. Mam Akraafttriede vun der Eenheetlecher Europäescher Akt 1987 gouf den Europäesche Conseil als EU-Institutioun an d'Europäesch Traitéën opgeholl.

Virum Akraafttriede vum Traité vun Nice waren des Sommetën gewéinlech an deem Land, dat grad d'Presidence huet, zanterhir ass dat ëmmer méi dacks zu Bréissel, am Justus-Lipsius-Gebai, do, wou och de Conseil vun der Europäescher Unioun säi Sëtz huet.

[Änneren] Soss

Den Europäesche Conseil ass z'ënnerscheede vum Conseil vun der Europäescher Unioun, deen, zesumme mam Europäesche Parlament, d'Legislativorgan vun der EU ass: hei stëmmen déi jeweileg Fachministeren nei Gesetzer of, déi an der EU gëllen.

Weider däerf een en net mam Europarot (op franséisch "Conseil de l'Europe") verwiesselen. Dëst ass neemlech eng eegestänneg international Organisatioun mat Sëtz zu Stroossbuerg, déi näischt mat der EU ze dinn huet, an an deer och Länner wéi z.B. d'Tierkei a Russland Member sinn. Seng Kompetenz läit virun allem am Beräich Mënscherechter. Den Europäesche Geriichtshaff fir Mënscherechter ass Deel dovunner.