Advent
Vu Wikipedia, der fräier Enzyklopedie.
| Liturgescht Joer |
|---|
|
Advent (och nach Adventszäit, vu lat. adventus – Ukommen) heescht déi Zäitspan, déi vum 4. Sonndeg virum 25. Dezember (also Chrëschtdag) bis zum Sonnenënnergank um 24. Dezember geet. D'Längt vum Advent ass also variabel, je nodeem op wéi e Wochendag Chrëschtdag fält, mee en enthält ëmmer 4 Sonndeger (déi sougenannt Adventssonndeger). E stellt am Chrëschtentum den Ufank vum Kierchejoer duer a gëllt als eng Virbereedungszäit op Chrëschtdag. Et gëtt sech also op d'Feiere vun der Gebuert vum Jesus virbereet awer och op säin eschatologescht Kommen um Enn vun der Zäit.
[Änneren] Bräich
- En Adventskranz ass e Kranz (hautdesdaags och alt e Blummenarrangement) aus Dännen- oder Fiichtenäscht, op deem 4 Käerzen ugemaach sinn. Jidder Adventssonndeg gëtt eng Käerz méi ugefaang. Esou sinn dräi Symboler am Adventskranz ze erkennen: ronn fir d'Onendlechkeet vu Gott (keen Ufank a keen Enn), gréng Faarf fir d'Hoffnung an d'Liicht dat ëmmer méi grouss gëtt an esou op d'Komme vu Christus soll hiweisen.
- En Adventskalenner ass en Ensembel vu 24 zouenen an numeréierten Unitéiten (Titercher, kleng Päck oder einfach kartons Dieren iwwert engem zweete Karton). All Dag tëscht dem 1. an dem 24. Dezember gëtt déi Unitéit mat der entspriechender Nummer opgemaach an den Inhalt kënnt zum Virschäin (Bild, Stéck Schokola, klenge Kado etc.).
[Änneren] Advent fréier an haut
De Poopst Gregor I. huet d'Zuel vun den Adventssonndeger am 6. Joerhonnert op véier festgeluecht, virdru waren et der je no Géigend véier bis sechs. Zu deem Zäitpunkt a bis zum 20. Joerhonnert (an der orthodoxer Kierch och nach haut) war den Advent, wéi d'Faaschtenzäit virun Ouschteren, eng Preparatiounszäit, während deer gefaascht gouf. Chrëschtdag gouf da vum 25. Dezember bis de 6. Januar gefeiert.
An der heiteger Zäit ass et éischter esou wéi wann an der Gesellschaft Chrëschtdag géif während dem Advent (an deelweis souguer schonns virdrun) virgefeiert ginn (Chrëschtmäert a Chrëschtfeiere fanne während dem Advent statt), wougéint spéitstens nom 26. Dezember déi meescht Spure vu Chrëschtdag ganz séier veschwannen.
