Vincentius van Gogh

E Vicipaedia

Imago Vincentii van Gogh a se ipso picta

Vincentius Guilelmus Van Gogh (30 Martii, 1853–27 Iulii, 1890, prope Lutetiam) pictor fuit generis postimpressionistici. Natus est die 30 Martis, anno 1853, apud vicum Zundert, in Batavia sive Nederlandia, pastoris Protestantis filius.

[recensere] Vita

Vincentius inde a puero indolem prae se tulit morosiorem atque animum fortem; unde artifex exstitit singulari praeditus inventionis vi, sed perturbatae mentis. Adolescens operam navavit in pinacopolio, sive picturarum taberna. Postea, fervore religioso correptus, dedit se theologiae studio; mox divini verbi minister receptus, animarum curam exercuit inter carbonum fossores in pago Petit Wasmes, in Belgica. Anno demum 1886 Lutetiam Parisiorum petivit, ut ibi fratris Theodori contubernio frueretur, qui picturarum mercaturam haud parvo sucessu exercebat.

Inde anno 1888 in Provinciam Gallicam sive Galloliguriam profectus, sedem fixit Arelati (Arles), suadente Paulo Gauguin, et illo pictore, quem Lutetiae inter pictorum conciliabula cognoverat. Quo tempore Vincentius suas tabulas coloribus mire saturatis induere coepit, imprimis flavo, viridi, caeruleo. At spatio bimestri vix confecto, exortae sunt rixae truculentae inter Vincentium et Paulum Gauguin. Tandem factum est die quodam ut concitato iurgio, Vincentius Paulo novacula minitaretur, nocteque insequenti sibi ipse furens excideret aurem. Detinetur Vincentius dies paucos in manicomio Arelatensi; mox ad Sancti Remici vicum commigrat, haud longe inde semotum, ubi annum totum in valetudinarium psychiatricum permansit. Quo tempore etsi haud raros patiebatur insaniae insultus, tamen tabulas pingere sedulo perrexit.

Postea menses tres in vico Auvers-sur-Oise degit, prope Parisios, curae Pauli Gachet medici commissus, viri animo in Vincentium amicissmo, cuius extant imagines nonnullae ab ipso artifice pictae. Eodem in vico die 27 Iulii, anno 1890, recrudescente melancholica insania, Vincentius ictu sclopeti sibi mortem conscivit, dieque tertio in complexu fratris efflavit animum, annos natus vix 37.

Epistulas plus 700 ad Theodorum fratrem conscripsit, nempe momentum pretiosissimum, unde mira vitae mentisque artificis notitia hauriri potest. Tabulas pinxit ad 900, delineationes circiter 1100 confecit. Artifex prodromus et quasi antesignanus, Vincent van Gogh vim exercuit incredibilem in saeculi vicesimi picturam artesque omnes ad visum pulchrumque spectantes.