Soror Ioanna Agnes a Cruce
E Vicipaedia
Soror Ioanna Agnes a Cruce (Hispanice: Sor Juana Inés de la Cruz, seu Juana de Asbaje y Ramirez de Santillana) erat monacha, poetria, et dramatum auctrix Mexicana), nata anno 1648 oppido Sancti Michaelis Nepantlae prope Amecamecam (in Mexici Statu) defunctaque vitae anno 1695 in Mexicopolei, tunc caput Novae Hispaniae. Ultima fuit inter linguae Hispanicae Aurei Saeculi scriptores magnos, dicita Fenix Americarum et Decima Musa.
Ante annum decimum aetatis suae didicit linguam Mexicanam ab incolis oppidi sui et linguam Latinam viginti tantummodo lectionibus, ut fertur. Puella adhuc studiosissima litterarum facta est et legit praesertim Latinos et Graecos auctores atque Ecclesiasticos Patres. Postea, iam adulescens, in aula Vicarii Regis Hispaniae Novae versabatur, Marchionam Mancerae, Vicarii Regis uxorem, comitans. Voluit tunc Universitatem studiorum frequentare ut audiret scholas, sed cum accesus interdictus esset mulieribus decrevit tandem monacha fieri. Ingressa est primum in conventum Carmelitarum et conata est profiteri apud eas sed regula illic extremae rigiditatis erat et salus Ioannae flaccescit; tentavit deinde apud Hieronymas quarum disciplina laxior videbatur. Mansit illic, ubi amplam cellam habebat et optime instructam multis libris et instrumentis musicis. Vitam enim illic egit tranquillam, poemata sacra scribens et profana, carmina Nativitatis, dramata sacramentalia et comoedias duas, quamquam confessor eius, Iesuita Antonius Nuñez de Miranda,voluit eam prohibere ne scriberet neque cum hominibus saeculi comercium haberet, quam ob rem Soror Ioanna, sub auspicio Marchionae Paludis, eum postea repudiavit confessorem.
