Kulturi
From Wikipedia
Katuaq 'Katuaq ukiuni qulini'.
Katuaq ukioq manna 2007-mi februari qaammammi (17. februar) ukiuni qulinngortorsiorluni nalliuttorsiorpoq. Katuap pilersinneqarnissaa aalajangiunneqarneralu sioqqullugu, inuiaqatigiinni oqallisaasimavoq ilumut kalaallit inuiaqatigiinnut, illorsuassarlu Nuummi inissisimasussaasoq, akilerlunilu iluaqutaasinnaanersoq. Apeqqutit makku 1980-ikkut qiteqqutilernerata missaani apeqqutigineqartarsimapput. Kulturimut illussarsuaq Nuummiunut kisimi iluaqutaannaassanngila, sineriammiittut innuttaasut amerlanerussuteqartut qanoq iluaqutigisinnaavaat najorsinnaanngikkunikku, alakkarsinnaanngikkunikku, aningaasarpassuit 80 mio. kr.-nit missaat atorneqartussaasut, siammartiterlugit sineriammut sooq atorneqaannarsinnaanngillat il.il. Kulturimulli illussarsuaq aalajangiunneqarpoq, 1997-milu naammassineqarpoq. Ukiut qulit iluanni Katuaq-lu pilersinneqarnerminiit, sineriammiit innuttaasorpassuarnit alutorineqarlunilu pulaarneqartareerpoq, sulilu takornariarneqartuartarluni. Nuummiut innuttaasullumi sineriammi Katuaq pigisamittut, alutorsaatigisamittut, tigoreernikuuvaat nuannaralugulu. Nunamiulli assigiinngitsut, takornarissat, Katuaq tusaamallugu aamma alakkarusuttarpaat.
Katuaq ullumikkut assigiinngitsutigut pisoqarfiullunilu atorneqartarpoq. Isiginnaartitsinerit, saqqummertitsinerit, tusarnaartitsinerit, ataatsimeersuartitsinerit, kulturikkut pikialaarnerit assigiinngitsut il.il. Ataatsimut kulturikkut, eqqumiitsuliornikkut, inuiaat assigiingitsut paarlaasseqatigiinnermut tunngatillugu naapittarfiuvoq. Sineriammut Kulturikkut allatigulluunnit pisoqartillugu soorlu inuiattut ullorsiornitsinni, KNR suleqatigalugu aamma Katuaq-miit aallakaatitsisoqartarpoq, taakkulu nuannarineqartarlutik. Nunatta avammut igalaaraa, taamatut oqaatigisinnaagunarparput. Katuaq aamma filmertarfeqarpoq innuttaasunit atorneqarluartoq. Kafetuaq aamma najorneqarluartarluni atorneqarluarportaaq. Katuap illorsuartaa aamma silataaniit iluaniillu kusanarpoq. Illoqarfiup qeqqaniippoq, taamaattumillu orniguminarluni. Alakkarsimanngikkaanni innersuussutigineqaannarsinnaavoq pulaassallugu. Katuaq ukiut qulit tullissai eqqarsaatigalugit soqutiginassaaq malinnaaffigissallugu. Qularnanngitsumilli kulturikkut allatigullu nuntaanik soqutiginartunillu innuttaajusugut nuannaarutissatsinnik, immaqalu puigukkiutissatsinnik, immersorneqarlutalu misigisaqartinneqartarumaarpugut.
(Allattoq: SJ Juli 2007)