Antasena
Saka Wikipédia, Ènsiklopédhi Bébas ing basa Jawa / Saking Wikipédia, Bauwarna Mardika mawi basa Jawi
Antasena utawa uga sinebut Anantasena. Teges tembung ananta yaiku tanpa wates déné sena yaiku njaga, nguwasani, kang mimpin.
Ing pedhalangan gagrag Jogjakarta, Antasena iku anak ragilé Bima/Werkodara. Ibuné Dèwi Urangayu, putriné Hyang Mintuna (déwaning iwak ing banyu tawa) ing Kisiknarmada (muarané Gangga karo Serayu). Wiwit lair urip bareng karo ibu lan éyangé. Ing gagrag Surakarta, Antasena kuwi asma liyané Antareja (anak pembarepe Werkudara).
Ing wayang, Antasena iku kasatriyané ing Selamirah iya Randhugumbala. Garwané sesilih Dèwi Jenakawati, putriné Janaka/Arjuna. Satriya iki uga raket karo wuragilé Arjuna, Wisanggeni.
Antasena ora naté gelem nganggo basa krama, jujur, prasaja, lan kendel. Gandhèng ibuné urang, awaké kebak sisik kang ora mempan déning gaman. Kadigdayané ana ing sungut mawa upas kang mapan ana sangisoré irung karan sungut upas warayang lan pengantèn lan nduwé aji-aji Cupu Madusena sing bisa nguripké wong kang mati ing njaba takdiré.
Nalika Perang Baratayudha arep diwiwiti, Antasena ngadhep Sanghyang Wenang. Sanghyang Wenang sabda yèn Antasena kepengin Pandhawa menang, satriya iki kudu ora melu perang. Antasena nyanggupi nurut kekarepané déwa. Sanghyang Wenang njaluk supaya Antasena ndeleng netrané. Suwé-suwé awaké Antasena dadi cilik lan banjur muksa.
