Paco Martín

Na Galipedia, a wikipedia en galego.

Francisco Martín Iglesias é o nome de nacemento do escritor galego Paco Martín, nado no barrio de Recatelo (Lugo) o 22 de febreiro de 1940.

Mestre de ensino primario até a súa xubilación. Dirixiu o semanario Axóuxere, publicou a súa primeira obra en 1971, dunha escolma de pequenas pezas narrativas que leva por título Muxicas no espello. Data de 1976 a súa primeira novela No cadeixo, finalista do Premio Galaxia de novela convocado en 1975 con motivo dos 25 anos da editorial. En 1981 publicou a novela E agora cun ceo de lama.

Moi coñecido na literatura infantil galega e traducido a varias linguas por Das cousas de Ramón Lamote (1985), que aportou a historia da literatura galega a entrañable figura de Lamote, amais de aportarlle ao autor o Premio Nacional de literatura infantil 1986 e de lle ter proporcionada merecedia sona fóra das fronteiras de Galiza, e sobretodo grazas á tradución española que correu por Latinoamérica. Escribiu tamén Lembranza nova de vellos mesteres (1988), Servando I rei do mundo enteiro (1990), Tres historias para ler á noite (1992). Recolleu adiviñas galegas que publicou en O libro das adiviñas (1975) e ¿Que cousa é cousa?... Libro das adiviñas (1985). Doutra banda, ten sido un dos pioneiros da escrita de libros de texto en galego da súa autoría son os libros Lúa Nova 1 e 2 (1978) e máis tarde Galego 1 e 2 (1985).

No 2006 saíu ao mercado o seu novo libro "A bisneta lercha", que, baseándose no conto tradicional, tenta dar un novo pulo a escritura de fábulas.

En 2008 publicou unha secuela de Das cousas de Ramón Lamote, titulada Das novas cousas de Ramón Lamote.

[editar] Obra

Muxicas no espello, 1971
No cadeixo, 1976.
E agora cun ceo de lama, 1981.
Das cousas de Ramón Lamote, 1985. Premio Nacional de literatura infantil en 1986. Mención na lista de White Ravens.
Lembranza nova de vellos mesteres, 1988
Servando I rei do mundo enteiro, 1990
Dende a muralla, 1990
Tres historias para ler á noite, 1992.
A bisneta lercha, 2006.
Sabeliña e os ratos, 2007.
Das novas cousas de Ramón Lamote, 2008.