Kalandraka
Na Galipedia, a wikipedia en galego.
Kalandraka é unha editorial pontevedresa especializada na edición de libros infantís. Naceu no ano 1998, baixo a inspiración dun grupo de persoas ligadas ao mundo do ensino e da literatura infantil nas súas vertentes de animadores, autores, ou difusores.
Iniciouse con dúas coleccións:
- Demademora pretendía recoller a obra dos escritores e autores actuais.
- Os Contos do Trasno Comodín acollía as adaptacións dos contos clásicos ou a versión dos contos populares de diferentes culturas.
Ao longo destes anos foi diversificando a súa produción con novas coleccións:
- Tras os Montes, para recoller obras xa publicadas no estranxeiro,
- Seteleguas e Tiramillas, para lectores de entre 8 e 10 anos, e 10 a 12, respectivamente.
Pouco despois da súa fundación ábrense ao mercado en castelán, éuscaro, catalán e portugués. Foi a primeira editorial galega que tentou a introdución nas áreas de lingua non galega.
Moitos ilustradores iniciaron nesta editorial a súa andaina polo mundo da literatura infantil e pouco tempo tardaron en chegar os recoñecementos en forma de Premios Nacionais:
- Óscar Villán con O coelliño branco foi Premio Nacional de Ilustración no ano 1999.
- Federico Fernández no 2001 con Onde perdeu Lúa a risa?.
- Artefactes, recibiu o premio ó libro mellor editado do ano 2003.
- Pancho 2º Premio Nacional de Ilustración no ano 2003.
- Un lugar en el bosque foi Premio Nacional de Literatura infantil no Uruguai no ano 2004.
- Smara foi Premio Isaac Díaz Pardo ao libro mellor ilustrado do ano 2006.
- Pucho o habitador dos tellados recibiu o Premio Nacional de Edición no ano 2007.
- A estes habería que engadir outros premios como o Llibreter, Daniel Gil, en varias edicións ou o Junceda.
A filosofía desta editorial está definida pola importancia que lle dá á ilustración e o coidado que pon na impresión e na edición das súas obras.
Moitos dos seus libros foron traducidos a outras linguas (xaponés, coreano, grego ou hebreo entre outros).
