Julián Hernández
Na Galipedia, a wikipedia en galego.
Julián Hernández Rodríguez-Cebral é un cantante e guitarrista galego nacido en Madrid en 1960. É un dos fundadores e líder de Siniestro Total. Tamén tivo incursións como escritor, xornalista e actor.
Aínda que nacido en Madrid, pasou toda a súa infancia en Vigo onde comeza a súa afición polo rock e todo o que el mesmo chama "cultura popular". En Vigo relaciónase con poetas do movemento Rompente, así como con outros intelectuais que vivían na cidade nos anos 80, entre os que estaban Manolo Romón e Antón Reixa.
De novo en Madrid, onde se matricula no conservatorio de música, Julián entra en contacto coa chamada movida madrileña, movemento que xa se vivía en Vigo, aínda que nunha escala menor. Os seus contactos con diversas personaxes relacionadas con selos independentes de Madrid o axudarán a dar a coñecer ao grupo que ten cuns amigos en Vigo, Siniestro Total. Así Julián converterase en non moito tempo de fan da movida a protagonista da mesma.
Ademais da súa relación con Siniestro Total, Julián participou en outros grupos paralelos, ás veces pensados para unha soa actuación e outros a máis longo prazo. Hernández participou na creación de Def Con Dos, grupo para o que produciu varios discos co seudónimo de Padre Damián J. Karras, nome dunha personaxe da película O exorcista. Na actualidade mantén o dúo Transportes Hernández y Sanjurjo, xunto ao acordeonista Rómulo Sanjurjo (ex-membro de Os Diplomáticos de Monte-Alto). Tamén é columnista en diversos xornais e escritor, así como produtor de novos talentos do panorama musical, dentro da súa produtora Discos de Freno.
