Internet Movie Database
Na Galipedia, a wikipedia en galego.
A Internet Movie Database (IMDb) (en galego: Base de Datos de Películas en Internet) é unha base de datos en liña con información sobre directores, produtores, actores, películas, programas de televisión, videoxogos e case todo o relacionado coa industria fílmica privada e independente. Propiedade de Amazon desde 1998, IMDb celebrou o seu decimoquinto aniversario o 17 de outubro de 2005.
Índice |
[editar] Breve descrición de IMDb
IMDb contén unha exhaustiva lista de películas e programas de televisión de todo o mundo, incluíndo resumos, imaxes, cuestionarios, erros, curiosidades e datos comerciais. Tamén recolle novas, aínda que estas case exclusivamente relacionadas co ámbito estadounidense.
Os foros de IMDb son comentarios do público e preguntas sobre películas, os seus gustos ou desagrados. Por políticas explícitas de contido os moderadores eliminan as mensaxes que se consideran ofensivos. Desde abril de 2005, o uso do foro está restrinxido ós socios de IMDb.
Aproximadamente o día 20 de febreiro de 2007 cámbiase o deseño de portadas para as películas. [1]
IMDb ten unha páxina irmá chamada IMDB Pro, unha base de datos máis complexa que a básica que necesita unha suscrición de pago. IMDb Pro diferénciase en que dispón de miles de contactos de persoas e empresas ligadas á industria cinematográfica norteamericana, así coma información de casting. A diferencia do IMDb tradicional en IMDb Pro as películas de fala non-inglesa aparecen cos seus respectivos títulos traducidos. Sen embargo, é posible consultar películas polos seus títulos traducidos sen utilizar a versión de pago mediante esta página.
Calquera usuario rexistrado pode subministrar información á páxina, aínda que esta non se fai visible de xeito inmediato, senón que é revisada e pasa un tempo ata que aparece na web. Tamén se ofrece a posibilidade de puntuar as películas, programas etc.
[editar] Historia
No ano 1990 Col Needham deseñou un arcaico sistema de busca para os inxentes listados que se estaban elaborando no grupo de Usenet “rec.arts.movies.” Así, o 17 de outubro de 1990 marca o comezo da historia da Internet Movie Database, aínda que o sitio web tardaría tres anos en chegar e seis en adoptar o seu nome definitivo. Col Needham viu en 1995 que tras aquel sitio, o primeiro da rede dedicado ó cine, había moito futuro; así que deixou o seu traballo e converteu IMDb en empresa.
Só haberían de pasar tres anos para que Jeff Bezos, fundador de Amazon.com, vira na base de datos cinéfila por excelencia a posibilidade de expandir o seu negocio cara ó sétimo arte. Desde aquel momento a IMDb viviu como mera espectadora, baixo o paraugas de Amazon.com, unha forte crise económica do sector durante os primeiros 2000. Na actualidade a IMDb é un punto de referencia para todos os internautas en termos de cine (e televisión) e un lugar obrigado para promocionar as grandes estreas de Hollywood.
[editar] Faltas
Aínda que a IMDb semella recompilar a absoluta totalidade de películas producidas no mundo, detectáronse algunhas ausencias, debidas quizais á escasa trascendencia das mesmas e/ou a que son os propios usuarios rexistrados quen aportan información nova en moitas ocasións. Sobre todo hai carencias no mundo da curtametraxe e producións non anglosaxonas, aínda que a inmensa maioría de longametraxes mundiais están na web. Ademais, hai profesionais que aparecen por duplicado por seren creados dúas veces con pequenas variacións no nome. No caso español e galego isto adoita ser frecuente polo uso ou non dos tiles.
No eido galego, faltan algunhas curtametraxes e programas de televisión, o que non quita para que se recollan multitude de producións e profesionais e que se trate dunha base de datos moi valiosa tamén no relativo á produción audiovisual galega.
