Carlos Mella
Na Galipedia, a wikipedia en galego.
Carlos Mella (A Estrada 1930) é un economista, político e escritor galego.
Estudou a carreira de dereito na Universidade Complutense de Madrid e ciencias económicas na Sorbona de París.
Elixido deputado por UCD nas primeiras eleccións ao Parlamento de Galicia (1981), tras a desfeita de UCD nas eleccións xerais de 1982 liderou un grupo de oito deputados de UCD que pactaron con Alianza Popular entrar no goberno galego, converténdose Mella en vicepresidente para asuntos económicos o 7 de marzo de 1983 do goberno presidido por Xerardo Fernández Albor.
A decisión da Casa Real de designar a Domingo García Sabell para facer a ofrenda do Apóstolo do ano 1984 provocou o malestar do goberno galego ao considerar que o elixido debera ser o Presidente da Xunta, Carlos Mella nunha rolda de prensa manifestou que a Casa Real cometera un grave erro político e ofendera a Galicia, duramente criticado desde os medios políticos e de comunicación de Madrid, recibiu non obstante o apoio de Manuel Fraga e da prensa galega; o rei de xira en Sudamérica decidiu voltar antes de tempo e facer el mesmo a ofrenda poñendo fin á polémica.
Dimitiu por discrepancias con Xosé Luís Barreiro Rivas, o vicepresidente para asuntos políticos, en abril de 1984. Mella integrou o proxecto de partido nacionalista de centro, Coalición Galega co que consegue acta de deputado nas eleccions de 1986, posteriormente secundou a escisión que deu orixe ao Partido Nacionalista Galego, partido que abandonou xunto a Luís Cordeiro logo dunha serie de enfrontamentos que culminaron coa votación contraria do seu partido a unha emenda súa no que se creaba o Instituto de Crédito Galego, quedou como independente na Cámara o resto da lexislatura. En 1994 encabezou a candidatura do BNG ao Parlamento Europeo, sen saír elixido.
Carlos Mella foi presidente da Asociación de Escritores en Lingua Galega, porén só ocupou o cargo durante vinte días en xullo de 2001.
[editar] Obra publicada
- Non somos inocentes, 1990
- A Galicia posible, 1992
- O protocolo xaponés, 1992
- Bieito, Bieito, 1993
- A falacia do economicismo, 1994
- Coa palleta distraida, 1994
- Luces de Fisterra, 2005
