Almudena Ariza

Na Galipedia, a wikipedia en galego.

Almudena Ariza Núñez (Madrid, 1 de setembro de 1964) é unha xornalista española.

[editar] Biografía

Licenciada en Xornalismo poa Universidade Complutense de Madrid, iníciase profesionalmente na radio, ingresando na Cadena SER con tan só dezasete anos. Nesa emisora intégrase nos servizos informativos onde permanece varios anos.

En 1989 ingresa en Televisión española e un ano despois debuta ante a cámara, acompañando a Jesús Hermida no Telediario nocturno que nese momento recibe o nome de Diario Noche e onde se encarga de relatar a Crónica del día.

En 1994 presenta o concurso ¿Cómo lo hacen?, xunto a Jordi Hurtado que só se mantivo un mes en parrilla e que foi a súa única incursión máis alá dos espazos informativos, xa que dous anos despois compartía plató con Matías Prats na presentación da primeira edición de Telediario.

En 1998 pasou ó Telediario de fin de semana, xunto a Pedro Sánchez Quintana e Sergio Sauca e un ano máis tarde trasladouse a Nueva York para completar a súa formación xornalística.

Ó seu regreso, e pese a facer algunhas suplencias na presentación do espazo Informe Semanal (en 2000), especializouse en reporteirismo, e nos últimos anos cubriu entre outros eventos, os Ataques do 11 de setembro de 2001 de Nova York, os conflitos bélicos en Afganistán e Irak, o terremoto de Bam en Irán ou a catástrofe do buque Prestige.

Tamén imparte clases de Empresa Audiovisual. Televisión e de Técnicas da Información Audiovisual na Universidade Francisco de Vitoria de Madrid.