Sante Sabide
De Vichipedie, la enciclopedie libare dute in marilenghe.
Sante Sabide, une sante imagjinarie de tradizion cristiane di Aquilee, si venerave in dut il Friûl, che forsit e ven de usance che une volte e jere in Friûl di celebrâ la sabide tant che zornade di fieste. Sante Sabide, seont il studiôs Gjilbert Pressac puarte dret a lis primis comunitâts cristianis che a vignaressin de tradizion judaiche cristiane alessandrine. La origjin di chest cult e je ancjemò misteriose e lis ipotesis a son tantis: cualchidun al pense che si à di lâ a cirîle te vicinance de glesie primitive di Aquilee cul ebraisim e cu la glesie dal orient; altris impen a pensin a une derivazion dal paganisim; altris ancjemò a une origjin dute cristiane, dal cult de Madone. Dut câs, lis dedicazions a Sante Sabide a son deventadis daspò dedicazions ae Madone.
Une des carateristichis de zovine glesie di Aquilee al jere il pês che al veve il viaç di Jesus intal unfier la gnot de Sabide Sante.
 |
« A vignirin sù i massârs che a lavoravin la tiere ad ôr de lagune, là jù, dongje i pins de marine, si sbudielarin su la rive dal Menîr jenfri lis pieris e po si strenzerin la man e a lavorarin e si maridarin insieme. A vignirin altris cuntune crôs e peraulis di amôr su la bocje, e parsore des cjasis, a soreli jevât, e florì fûr la gleseute cristiane de Sante Sabide, e al spontà sù un tor alt cuntun cjampanon de vôs tonde e çondare; e il cimitieri, [...] la crôs ogni matine e ogni sere, devant: “In nomine Patris, Filii et Spiritus Sancti...” Diu al jere ogni dì cun lôr: i fevelavin di fîs, di fradis, di amîs ... e lu blestemavin, ancje, ce no! ma di cûr.»
|
|
(Da "Lis liendis vieris" di Dino Virgili)
|
[cambie] Lûcs di devozion a Sante Sabide
La devozion popolâr e à puartât a gleseutis e anconis dedeadis a Sante Sabide, il predi e storic Gugliem Biasut a 'ndi conte ben 21: Sante Margarite; Spilimberc; Poç di Sant Zorç de la Richinvelde; Sant Vît dal Tiliment; Gleriis; Gorc; Frofean; Sant Zorç de Richinvelde; Guricize; Sant Andrât di Talmassons; Porpêt; Risan; Antognan; Colorêt di Montalban; Daçan; Siest; Chions; Frate di Fossalte, Pradipoç e Sumaghe. Altris a 'ndi è in Istrie.
Cemût tancj lûcs di cult dedeâts a une sante che no je in nissun martirologi cristian? Ancje pre Biasut al sosten che l'ûs al varès di vignì des primis comunitâts cristianis di Aquilee e Concuardie che par lunc timp a àn fate fieste la sabide.
[cambie] Testemoneancis storichis
Chest al è testemoneât ancje dal patriarcje Paolin a la conclusion dal Concili provinciâl di Aquilee tignût a Cividât tal 796-797. In chel timp i cristians de campagne (dal Aquileiês e dal Concuardiês) a tignivin tant che zornade di polse, compagn dai judeus, la polse inte zornade de sabide impen che la domenie. Ancjemò tal 1499, il patriarcje Domeni Grimani al prescriveve che e ves di sunâ la Avemarie ancje a misdì, e obleave a lâ a vore par dute la zornade de sabide ai cristians, e che chê zornade no fos calcolade festive come lu ere fin in chel moment. Ancjemò tal 1603 monsignor Agostino Bruno, delegât dal patriarcje, in visite pastorâl in Cjargne al à testemoneât cheste usance secont lui un grum grâf.
Il studiôs C.G. Mor, al à cjatât che chest ûs di Sante Sabide al è logât simpri in puescj dongje da lis aghîs.
Gjilbert Presac, al sosten che «in gjenerâl, fin a la alte ete di mieç la Glesie jere interessade a tignî bogns i ûs ebraics ancjemò vîfs intes campagnis ».
