Gnespolâr
De Vichipedie, la enciclopedie libare dute in marilenghe.
- Non furlan: Gnespolâr
- Non sientific :Mespilus Germanica
Ancje cheste plante e à la sô divignince dal aprûf Orient o da l'Europe disot. De famee des Rosacee, il gnespolâr al pues rivâ fintremai a une altece di dîs metris. Inte Furlanie al ven su tal plan e tes zonis de mont mezane e basse, par altri ca e la insalvadeât tai boscs.
Il mespilus germanica si preferìs cui ramaçs ben disponûts dut in tor il tronc e cuviert di une stiele grise e ruspie. Lis fueis a son lungjis, ovâls e a àn la ponte cjonçade. In ponte a çuf di curts zermois a vegnin fûr lis rosis, bielis di viodi, cun cinc petai cjapâts dentri tal cjalis. Inmò il cjalis al reste zontât a la ramute e vierzintsi al lasse spazi a la pome che e cres.
La pome si clame gnespul, e e je tal prin une vore dure, verdone e garbe par po daspò cuistâ un colôr zâl brun. Di madure e devente dolce e muslite, vâl a di adate di puartâ in taule a la fin di un gustâ.
