Segi

Wikipedia(e)tik

Ekitaldia Gazte Martxaren bukaeran. Atzealdean Jarrai, Haika eta Segiren ikurrak ikus daitezke.

Segi Euskal Herriko gazte erakunde independentista eta iraultzailea da. Jarrai eta Gazteriak erakundeen elkartzeak sortu zuen Haika erakundearen oinordekoa da eta gaur egun Hego Euskal Herriko lau lurraldeetan legez kanpo dago Espainiako Auzitegi Nazionalaren ustez ETArekin zerikusia duelako. 2007ko urtarrilean, Espainiako Auzitegi Gorenak talde terroristatzat hartu zuen eta bere hainbat kide gartzelan daude gaur egun.

Bere helburu nagusiak bi dira: independentzia eta sozialismoa.

[aldatu] Segiren izaera

[aldatu] Gazte eragilea

Segik bere burua gazte erakunde bat bezala definitzen du gazteez osatua egoteaz gain, euskal gazteriaren arazoak lantzen dituelako. Gazteria jendarte sektore berezitua den bezala, arazo propio eta espezifikoak ditu, eta Segi arazo horiek borrokatu eta alternatibak eraikitzeko bitartekoa gisa irudikatzen dute. Segiren jarduera ez da bakarrik gazte erakundearen proiektu politikoarekin bat egiten duten gazteetara mugatzen, euskal gazteri osoari zuzenduta dago. Segik Euskal Herriko gazte guztien mesedera egin nahi du lan. Gazteen arazoak jendartearen arazo bilakatu, gazteek Euskal Herriaren askapen prozesuan kolektibo berezitu gisa dituzten kezka eta arazoen abiapuntutik, jendartean dauden gazteengana helduz.

[aldatu] Euskal Herriko erakundea

Mugen gainetik, Euskal Herri osoan zehar eta errealitate guztietan lan egingo duen erakundea, auzoetan, herrietan, hiriburuetan eta eskualdeetan lan egiten du Segik. Errealitate ezberdinak kontutan hartuz, bere iharduera garatzen.

[aldatu] Erakunde independentista

Segi erakunde independentista da, eta honela justifikatzen du:

	Euskal Herriaren biziraupenerako aukera bakarra, herri honek askatasuna, hau da, independentzia eskuratzea izango da. Segi, erakunde abertzale eta independentista da eta bere jarduera, praktika independentista batean oinarritzen da.

[aldatu] Erakunde iraultzailea

Segi ere erakunde iraultzailea da eta hau ere honela adierazten dute:

	Segik jendarte eredu berri baten aldeko apustua egiten du. Sistema kapitalistaren hatzaparretatik kanpo egongo den gizarte baten eraikuntzan lan egiten du Segik. Ama lurraren defentsa, elkartasuna, sexu askatasuna, parekidetasuna eta ondasunen banaketa lantzen dugu egunez egun. Gure herriaren independentzia borrokatzen dugun bezala, herritarren independentzia pertsonala ere borrokatzen dugu. Ez dago herritar askerik gabeko herri askerik.Segik herrien arteko harremana eta elkartasuna bultzatu nahi du. Nazio eta jendarte askapen borrokan dauden herriekin bat egiten du gazte erakundeak. Munduko iraultzei Euskal Herriak egin diezaiekeen ekarpenik handiena Independentzia eta Sozialismoa lortzea da.

[aldatu] Erakunde euskalduna eta euskaltzalea

Euskara Euskal Herriaren hizkuntza izanik, Euskal Herri osoko gazteria elkar komunikatzeko tresna bakarra eta baliotsua dela uste dute. Euskara, gainera, hizkuntza batetik haruntzago nortasuna, izaera, kultura eta balore multzoa da. Segik, euskal gazteria eta Euskal Herria euskalduntzeko konpromisoa du, eta gazte erakundearen kanpo zein barne jarduera euskaraz burutuko da.

[aldatu] Erakunde feminista

Segik feministatzat du bere burua, eta bereziki emakume gazteek pairatzen dituzten zapalkuntzei aurre egiten dio. Parekidetasunean oinarritzen den jendarte bat eraiki nahi du egunero.

[aldatu] Erakundea baino, mugimendua

Segiko barne egituraren barnean lan egiten duten militanteak baino zabalagoa da Segi. Bere burua abertzale eta aurrerakoitzat hartzen duen gazte orok Segin lekua duela esaten dute.