Ehiztari beltza
Wikipedia(e)tik
Euskal mitologian maiz azaltzen den pertsonaia, atsedenik gabeko ibileran ehizagaien bila mendi eta aranetan barrena ibiliko dena.
Oso hedatua da pertsonai honen mitoa Euskal Herri osoan.
Beste izen batzuk ere ezagutzen zaizkio: Martin edo Mateo Txistu Gipuzkoan,Salomon erregea Zuberoan edo Joanito Txistularia Bizkaian, esaterako.
Gaskoniako landetan, mitoa izen zelta duen Artus erregea da. Zazpi urtetik behin azaltzen da munduari bira ematen denbora hori behar duelako.
Oso zabaldua da betiko atseden hartzera edo betiko sutara doazen arimak airean ibiltzen diren ustea. Gauez, ekaitza denean, suziriak pizturik daramaten arimek dabiltza airean gorpu berriei laguntzen.
Aezkoan, ekaitz bortitzek Iratiko zuhaitzak astintzen dituztenean, espiritu gaiztoek Albreteko Joanaren hilotza daramatela esan ohi da.
Joana protestanteen babeslea zen, eta katolikoen esanetan, lamiek eta sorginek darabilte haren gorpua erregina zen lurraldeen aireetan.
