Kırmanc

Wikipediya ra, ensiklopediya hosere

Eke gêrenay çekuya Khurrmanci, bıtıkne.

Zazaê Elewiê Dêsımi, xo rê Kırmanc vanê. Maney çekuya "kırmanc"i teyna Zazao Elewi niyo. Dêsım de şaro ke kokê xo ocağan ra nêno, yanê oyo ke pir, rayber niyo i rê ki kırmanc vacino. Hama elaqa çekuya "Kırmanc"i be "Khurrmanc"i çino. Çıke Zazaê Elewiê Dêsımi xo rê Kırmanc vanê, feqet Kurdanê Elewian rê Kırdas u Kurdanê Sunnian rê ki Khurr vanê. Yanê Dêsımıci ebe xo rê Kırmanc vatene, hem Kurdanê Sunnian ra hem ki Kurdanê Elewian ra xo bırrnenê-a. Feqet zaf rey, Elewiê Dêsımi Elewian pêronan rê ki "Kırmanc" vanê; ha Elewio Tırk bo ha Elewio Ereb bo u ha Elewio Kurd bo, ferq nêkeno. Eke ma Zazakiê Dêsımi de maney çekuya kırmanci bınuşime, ni nasdaişan vênenime;

1. Kırmanc : Zazao Elewi
2. Kırmanc : Elewi
3. kırmanc : Oyo ke raya pir u murşidan dıme şono, feqet kokê xo ezbeta ocağan ra niyo ya ki şari rao, i rê kırmanc vacino.

• Kırmancki : namey Zazakiê Dêsımio. Zazaê Elewiê Dêsımi xo rê Kırmanc u zıwanê xo rê ki Kırmancki vanê, oncia zıwanê Kurdan rê ki Kırdaski vanê. Yanê Zazakiê Dêsımi de; Kırmancki=Zazaki, Kırdaski=Kurdki o.
• Kırmanciye(1) : Zazaê Elewiê Dêsımi, xo rê Kırmanc, zıwanê xo rê Kırmancki u welatê xo rê ki Kırmanciye vanê, çekuya kırmanciye şüar u lawıkanê Dêsımi de zaf vêrena ra. Feqet Dêsımıci welatê xo rê zafêr DÊSIM ya ki KOÊ DÊSIMİ ("welatê ma koê dêsımio", "welatê ma bi thal, koê dêsımi bi thal...") vanê.
• Kırmanciye(2) : Maney na çekuyo bin ki, Elewine/Elewitine o (be Tırki: Alevilik). İtıqatê kırmanciye = itiqatê Elewine. Çekuyê zey Elewi u Elewitine zıwanê Zazakiê Dêsımi de çine bi. Zazaê Elewiê Dêsımi, xo rê hurêndia Elewi de Kırmanc ( rey rey Qızılbas); itıqatê xo rê ki Elewine/Elewitine nê Kırmanciye (be Tırki: Alevilik) vatêne.

Heto bin ra, İran de zey "Kirman", "Kirmanşah" nameyê sukan zafê u çekuyê zey "kırm, kirman..." zımey İrani de mıntıqanê zey Deylem, Gilan, Xorasan de zaf verenê ra. Beno ke kokê çekuya "kırmanc, (kırman+ıc)"i İran ra yeno.

[bıvurne] Bewne/Qayt ke

• Zaza
• Zazao Elewi
• Kırmanciye
• Dêsım
• Elewi
• Khurrmanc