Asmêno Bêwayir
Wikipediya ra, ensiklopediya hosere
Asmêno Bêwayir yew nuskaro Zazayo. Serra 1973ine de Estamol de ame riyê dınya. Keyey xo taê serri raver dewa Mazra Sılêmanu, Pılemoriye (Dêrsım) ra bar kerdo, ameyo Estamol. 1975 de piyê ey o be maya cı ra ardi Almanya. Ae ra nat ena dıwele de weşiya xo rameno. Uca şi mekteb. 1992 de kewt universıte u mıhendısina makina (vıraştena makina) wende.
Oyo ke Zazaki verê coy tenê areze (fam) kerdêne, hama qısey nêkerdêne. 1993 de dest kerd zıwanê ma u piyê xo, gına sero, musa. 1996 de redaksiyonê pêseroka Warey de ca gırewt. Taê gurenayışê xoyê zıwani, nuştey, kılamê xo pêserokan u internet de veciyay (taê ebe namey xoyê keyey, Mesudê Keşki).
Nıka Frankfurtê Maini de diwanê idarey Enstitüyê Zazaki de guriyeno u temsilkarê pêseroka Miraziê Ewropao. 2005 ra nat ki Universıtey Frankfurtiê Goethey de qısmê ilmê zıwanan de ilmê têverşanaena zıwanan (ilmê qıyasê zıwanan) de lızgey/gılê Hindo-Ewropaistiki (Indogermanistik) waneno.
